Den rueda di prensa di Partido POR e Plataforma Forza Nobo, Andin Bikker a anuncia cu den e prome cien dianan di gobernacion di POR, nan lo bay moderniza hopi di nos leynan anticua. Pesey Bikker ta papia hopi biaha di institui un Academia di Ley y den e leynan cu seguramente mester moderniza ta e leynan ambiental. Bikker a splica cu tin hopi ausencia di leynan ambiental, y POR ta haya hopi keho di personanan cu ta bisa cu den areanan habita ta wordo confronta cu ta bin fabrica di cement, cobamento di santo, cu nan ta biba 24/7 den casnan cera, cu airco, y nan ta haya nan cuentanan di coriente cu ta bin hopi halto, y cu nan yiunan ta haya nan mes cu problema di respiracion.
Bikker a bisa cu e kehonan aki ta bin di diferente bario y a critica cu den 8 aña di gobernacion, e gobierno aki a expone su mes cu e hecho cu e ta laga cada bez ciudadanonan forza di bay Corte, gasta fondonan priva, mientras cu eigenlijk e tarea principal di un gobierno ta reinforza nos leynan. E gobernante encarga net e a bay notario cambia e besteming di cierto terenonan pa acomoda e comerciantenan cu ta acerke pa haci esaki. Bikker a bisa cu e ta subraya esaki un rato pasobra canando den barionan e fin di siman cu a pasa, el a wordo notifica cu aworaki den e container waf nobo ora cu biento cambia, cu hopi biaha nan ta wordo confronta cu e huma di e compania estatal WEB, e ta afecta e trahadornan di diferente compania y di gobierno cu ta traha den e sector ey y cu nan ta man na cabes cu e situacion cu ta presenta eynan. Esaki ta un ehemplo cu nos leynan ambiental ta sumamente anticua y cu mester wordo moderniza, pasobra no ta asina cu constantemente bo ta haya ehemplonan palpable di kehonan di personanan di areanan habita, y otro ehemplo Parkientenbos netamente, pasobra esey ta un area cu ta wordo afecta, y cu aworaki nan ta sintie pasobra prome cu esey no tabata tin, eigenlijk, un construccion den e area akinan.
Bikker por a compronde cu tin un ley na caminda pa Parlamento, aparentemente, pa loke ta trata emision di e refineria. Lo mester wordo considera tambe otro industrianan cu tambe ta haci emision di gasnan cu lo por causa malestar pa e salud di nos pueblo.