Dia 13 di Juni, pa mas o menos 9 or y 40 di mainta, Central di Polis ta manda un patruya di Noord pa Calabas, pa un caso di maltrato. Na nan yegada a resulta cu no ta un caso di maltrato, pero ta un caso di ladronicia cu violencia. Polisnan ta papia cu e dama T, y polisnan a ripara cu e tabata hopi nervioso. Su banda di cara drechi tabata hincha. Den cuadro di esaki, polisnan a pidi Central pa manda un ambulance na dicho cas.
El a declara na polis cu e tabata sinta den patio, y e porta dilanti tabata habri. Diripiente el a tende un zonido ta bin for di den sala. El a bay den sala pa controla y el a wak cu su vaas tabata kibra, ariba vloer. Diripiente el a wak un homber desconoci p’e para dilanti di dje. E homber en cuestion no tabata tin permiso pa drenta den su cas. E homber aki tabata bisti cu un carson cortico color preto, e tabata di color bruin y delega. E no tabata tin t- shirt bisti. E tabata tin un muts ariba su cabes y un bril preto na su cara. E tabata mas o menos 1.75 m di halto. E denunciante T., a declara cu e homber desconoci aki a dal’e un mokete na su cara banda drechi, door di cual el a cay abao. El a ripara cu e homber a bay cu su cartera preto, marca GUESS. Den dje e tabata tin carchi di AZV, 1 carchi banco di CMB, 1 Visa Card, 2 biyete di 100 florin, 1 biyete di 25 florin y 2 biyete di 10 florin. Un colega den vecindario a bin haya e cartera na altura di percela number 17. E cartera tabata benta abao, y solamente e placa e homber a bay cun’e. Central a wordo poni na altura.