LIMA, Peru- Diamars anochi un homber a basha gasolin y cende un muhe na candela den un bus cu tabata transita den e bario Miraflores, na Lima (Peru). Eyvi Liset Agreda Marchena, un hoben Venezolano di 22 aña, victima di e atake, a laga otro dies persona herida debi na e candela cu a expande.
Según corant El Comercio, shete unidad di bombero a asisti na e luga y te ainda no tin morto pa lamenta. según informenan, e otro pasaheronan cu a sufri kemadura a wordo traslada pa e hospital Arzobispo Loayza den e capital Peruano.
Marchena a wordo asisti na prome luga pa e chauffeur, cu a uza un extinguisher pa paga e candela y despues el a wordo hiba pa otro hospital, Guillermo Almenara. For di eynan, e dokter Luis Bromley, a declara cu e muhe ta “hopi grave” y a sigura cu ta trata di “un caso di riesgo halto”.
“E tin mas di 50% di extension corporal cu kemaduranan di segundo y tercer grado”, el a enfatisa. E specialista a agrega cu e hoben lo mester wordo someti na “serie” di cirugia cu e obhetivo pa salba su vida.
Testigonan no a logra identifica e atacante, aunke nan a bisa cu e tabata bisti cu’n capuchon color oraño, e tabata tin un rugtas preto y e combustibel e tabata tin’e den un boter di yoghurt.
E vice minisiter di Muhe di Peru, Silvia Loli, a a califica e hecho aki como violencia di genero, calificando esaki como un “problema nacional serio”.
Segun e ultimo encuesta di e Instituto Nacional di Estadistica y Informatica (INEI) riba e tema, 7 di cada 10 muhe a declara di tabata victima di violencia un biaha den nan bida.