Homber perdi a wordo haya morto na Klein Bonaire

0

KRALENDIJK, Boneiro – E Centro di Coordinacion y Rescate (RCC) di Kustwacht (KWCARIB), a ricibi diasabra merdia un melding cu un homber lo tabata perdi riba Klein Bonaire. El a bay cu un grupo di turista y a wordo baha door di un boto, pero e no tabata presente ora cu a recoge nan na e ora palabra.
Unidad di Kustwacht na Boneiro a wordo alerta pa asina haci un buskeda, pero sin ningun resultado. Tambe e helicopter di kustwacht, AW139 a wordo manda laira pero den e oranan di anochi no por a haya nada. Riba diadomingo, na momento cu a bira dia, e helicopter a bay laira pa sigui busca y a topa cu e curpa sin bida di e homber na e costa nort di Klein Bonaire. E resto mortal a wordo pasa pa autoridadnan local di Boneiro, cu lo sigui cu e investigacion.