Polis a mira na altura di Wendy’s na Tanki Leendert, un auto di famia sin number di auto. E auto tabata para dilanti di dicho luga. E luznan di auto tampoco no tabata cendi. Tras di e stuur tabata tin un homber color scur. Polis a pasa banda di e auto y a bay para riba un distancia. Polis a para na altura di Tur Dia Foodmaart. Dado momento a mira dicho auto na e stacion di gasolin na Texaco Tanki Leendert. Riparabel tabata cu el a core tras di e stacion di gasolin y un rato despues a paga e luznan di e auto. Den cuadro di esaki, polis a core su tras. Mientras tanto a pidi refuerso di un otro unidad, mirando cu e auto a coy un caminda di santo direccion Matadera. Ora cu a acerca e auto, a nota cu el a drenta un pida mondi. El a sali pafo di e auto y na pia a bay direccion pazuid. Riba un manera tactico el a wordo acerca. Una bes acerca, a bin resulta cu ta trata di un homber habla Hispano. Riba e momento ey el a bira hopi nervioso y a cuminsa papia bruha. E no tabata por a mustra ningun identidad. El a nenga di duna su nomber. El a wordo deteni y hiba warda di Shaba. Despues a bin resulta cu tabata trata di MAAC, naci na Republica Dominicana y ta keda na un percela na Tanki Leendert. Segun su declaracion, e tabata en busca di su casa, mirando cu e tabata bezig cu nan procedura di divorcio. E auto a wordo hiba warda di Santa Cruz, mirando cu e ta casa cu e muhe K., biba na Tanki Leendert. Banda di 5’or di mainta, a dun’e un proces verbaal y a mande cas.