Willemstad Curacao: Diamars 15 di November 2016 alrededor di 16.44 or, Central di Polis a haña notificacion cu un homber a yega na un cas den Sint Jago y ta hopi agresivo.
Na momento cu polis a yega na e sitio nan no a topa cu e homber y a cuminsa cu un buskeda den e area. Nan a señala e homber net na momento cu e tabata bula un muraya y core bay.
Na altura di un radio emisora a bolbe señala e homber aki y a cuminsa un persecucion. Polis a los dos tiro di advertencia pero e sospechoso a sigui core. Den Monte Verde e sospechoso a bay para na un cas bandona cu dos piedra den man. Polis a lucha cu e sospechoso y pa kibra e atake polis a los tiro cu a alcansa e homber na su pia.
Ambulance a transporta e sospechoso pa policlinica di SEHOS pa tratamento medico. Polis a detene e homber E.J.C. naci na Korsou di 43 aña di edad.
A presenta e sospechoso dilanti un fiscal auxiliar cu a ordena su encarcelamento pendiente di mas investigacion.