E entradanan hudisial ku a inisiá awe mainta 13 desèmber 2016 bou di guia di un hues komisario ta ketu bai andando. Ta listrando entre otro den kas di e sospechoso arestá, F.C. (56), nase na Italia.
E tim ku ta kombatí kriminalidat ku ta mina (TBO) di Recherche Samenwerkingsteam (RST) a detené F.C. riba petishon di outoridatnan Italiano. Italia lo pidi pa su ekstradishon. Lo persigui e sospechoso na Italia pa froude ku impuesto i soborno di diferente polítiko. Tambe F.C. ta sospechá di a laba ganashinan ilegal pa medio di su kompanianan.
E aresto- i entradanan hudisial ta forma parti di un akshon internashonal kordiná entre paisnan Italia, Ulanda, St. Maarten i parti Franses di St. Maarten.
Na parti Franses di St. Maarten a arestá R.B. (56), nase na Ulanda mientras ta realisando diferente entrada hudisial. Na Italia tambe a detené sospechoso i realisá entradanan hudisial. Na Hulanda a listra den un ofisina. E akshon di awe ta resultado di un koperashon ku a inisiá seis luna pasa entre e Ministerionan Públiko di Italia, Ulanda i St. Maarten.
Relashoná ku e aresto, entradanan husidial i konfiskashon, e tim pa kombatí kriminalidat ku ta mina di Ofisina di Prokurador-General a aktua denter di e laso di koperashon aki.
E koperashon internashonal entre Italia, St Maarten, parti Franses di St. Maarten i Ulanda ta kuadra den e esfuersonan konhunto pa intensivamente kombatí kriminalidat ku ta krusa frontera manera korupshon i froude, kual tambe ta keda denominá komo krimnalidat ku ta mina.
Kriminalidat ku ta mina manera korupshon i labamentu di plaka ta forma un menasa serio pa seguridat i ekonomia di e paisnan den Karibe ku ta forma parti di Reino Ulandes. TBO di RST, Ofisinanan di landsrecherche di Kòrsou i St. Maarten i Ministerio Públiko ta partner den e esfuersonan pa kombatí kriminalidat ku ta mina.