KANSAS CITY, Kansas – Despues di a pasa 17 aña den prizon pa un robo cu semper el a nenga di a comete, e Mericano Richard Anthony Jones a wordo poni den libertad, despues cu nan a haya su dobel.
E hombernan ta parce otro asina hopi, cu testigonan a bisa cu nan no por a diferencia nan.
Cu e evidencia nobo aki, hues di e distrito Kevin Moriarty, di e condado di Johnson, na Kansas, a ordena e liberacion di Jones, aunke no a yega na acusa e otro individuo, kende tambe a nenga di a comete e robo.
Segun e magistrado, e hurado no lo a condena Jones, si nan a conta cu e evidencia nobo.
Jones a bisa di a haya un potret di e otro homber – cual parecido ta extraordinario y cu kende e ta comparti e prome nomber – ta mescos “cu haya un hangua den un sero di hooi.” “Mi no ta kere den suerte, mi ta kere mi a wordo bendiciona,” Jones a bisa e corant local Kansas City Star. Te na e momento no a presenta cargo contra su dobel, kende e conoce solamente como Ricky y kende ta nenga di a comete algun delito.
Jones a conta cu el a cuminsa na desespera y na kere cu nunca e lo a wordo libera di prizon, despues di varios intento di apela contra su condena di 19 aña pa un robo cu a sosode na 1999.
“Tur mi peticionnan a wordo nenga, tabata un caminda largo,” el a bisa.
Pero na 2015 el a informa na investigadonan di e Proyecto di Inocencia di MidWest – un grupo cu ta yuda prezonan inhustamente condena – riba un homber yama Ricky, di kende el a tende di dje.
Su compañeronan di prizon a bisa Jones cu e tabata identico na Ricky.
“Ora mi a mira e potret di mi dobel, tur cos tabata cla pami,” el a sigura.
Jones a wordo condena den base di declaracion di testigonan ocular.
No tabata tin prueba fisico, di ADN of fingerprint cu lo a implik’e den e crimen.
Cu su partner y su famia
Jones a converti den e centro di investigacion, despues cu un testigo a scoge su imagen di un base di dato di polis tres luna despues di e robo.
Pero autoridadnan no solamente a descubri cu e otro homber tabata tin un gran parecido cu Jones, sino cu ademas tabata biba cerca di e escena di e crimen den Kansas City, mientras cu Jones tabata biba leu di eynan.
Richard Anthony Jones a celebra su liberacion cu su famia.
Durante e huicio, abogadonan di Jones a argumenta cu su cliente tabata cu su amiga y su famia na momento cu e robo a tuma luga den un parke.
Tras di a conoce e evidencia nobo, un di e abogadonan a comenta cu e ekipo di defensor tabata “sorprendi” di cuanto Jones y su dobel ta parce otro.
Tambe nan a bisa cu e procedimentonan di identificacion di polis, 17 aña pasa, tabata defectuoso.
Jones a bisa na Kansas City Star, cu awo e ta adaptando bida pafo di prizon y cu e ta sinti su mes feliz di ta di regreso cu su yiunan.
Fuente: http://www.bbc.com/mundo