Hobennan profesional ta reconoce liderazgo di Prome Minister Mike Eman y ta busca su guia

0

Minister President Mike Eman recientemente a ricibi un grupo di adulto hoben kendenan a expresa e deseo di por topa personalmente cu e mandatario. Como cu formacion y participacion di hobennan semper a y ta hunga un papel importante den maneho di Ministerio di Asuntonan General, Ciencia, Innovacion y Desaroyo Duradero, mescos cu den tur otro Ministerio di su gabinete, e mandatario tabata mas cu complaci di atende e peticion.
E grupo di hoben, den su mayoria ta na inicio di nan carera profesional y/of tin aspiracionnan pa den futuro por carga un funcion den servicio publico. Durante un presentacion realisa na edificio di Cocolishi, mey mey di Centro di Gobernacion, Prome Minister Eman a comparti e vision di Gobierno y con esaki ta enfoca riba e bienestar general di nos nacion. E hobennan a keda gratamente impresiona pa e pasion con Premier Eman ta papia di e cohesion social, di progreso economico, y di e desaroyo di un industria di conocemento, entre otro temanan relevante.
Na final di e encuentro nan a manifesta nan gradicimento pa e oportunidad di topa personalmente cu e mandatario y tambe pa su atencion. E hobennan ta consciente cu no tur caminda ta haya e hefe di un Gobierno ta dedica tempo na comparti experiencia y tende e opinion di e hobennan.Pa Minister President Eman tambe tabata un encuentro masha agradabel y cu e ta balora ya cu semper ta purba di integra e perspectiva di hobennan ora di delinea e plannan pa nos pais.