WASHINGTON D.C., Merca – E democrata Hillary Clinton y e Republicano Donald Trump, lo realisa dialuna e ultimo esfuerso pa mantene bibo nan aspiracion pa yega na Cas Blanco, den e capitulo final di un campaña historico na Merca.
Despues di algo mas di un aña di marcha y contramarcha, dramanan inespera y un serie sin precedente di escandalonan di tur tipo, pa e exsecretaria di Estado y e polemico miyonario a yega na e momento di pone tur carta riba mesa.
E ultimo capitulo di e serie largo di gironan den historia di e campaña aki, a keda conoci diadomingo, ora cu FBI a informa Congreso cu cu no ta pretende di presenta cargonan formal contra Clinton, pa e interminabel escandalo pa su emailnan tempo e tabata secretaria di Estado.
E anuncio di FBI a busca pa paga, aunke sea un parti, e candela cu apenas un siman atras a bay ta provoca door di e mesun institucion na revela cu nan ta investiga mensahenan nobo relaciona cu Clinton pero no inclui den un investigacion anterior cu a wordo cera Juli ultimo.
“Nos ta contento di sa cu e asunto aki a keda resolvi,” Jeniffer Palmieri, responsabel di comunicacion di e campaña di Clinton, poco despues di conoce e decision di polis federal Mericano.
E anuncio aki a cay literalmente manera un bom riba e campaña di Clinton, ya cu a obliga e candidato pasa varios dia dunando splicacion riba un escandalo cu parce ta cos di pasado.
Poco despues di e anuncio di FBI, Clinton a realisa diadomingo un acto di campaña na Cleveland, Ohio, pero no a haci referencia na e caso, ni na e fin di e polemica nobo riba su mensaheria.
Posiblemente ta resulta imposibel midi e impacto cu e fin di e polemica riba e email di Clinton, por tin riba e campaña, pero durante e ultimo fin di siman prome cu e eleccion di diamars, e sondeonan a mustra Clinton dilanti di Trump cu un bentaha minimo.
Un sondeo realisa pa NBC y Wall Street Journal, a divulga diadomingo, a atribui na Clinton un bentaha di cuater punto porcentual na nivel nacional, un 44% riba 40%, den un encuesta cu ta inclui e dos candidatonan minoritario den e disputa.
Fuente: NTN24