Hopi hende cu ta yega na dokter cu un dolor fuerte di pecho of den casonan mas grave, cu un infarto cardiaco, ta caba na acepta cu nan dianan ultimamente tabata carga cu stress. Es mas, cu tempo dokternan a bin ta rastrea cu ta existi un coincidencia entre eventonan cu ta genera stress den e poblacion di un pais y e aumento di enfermedadnan cardiaco. Despues di un teremoto of ora cu e ekipo faborito di un pais ta hunga, por ehempel, e indicenan di afectacion di curason sa ta mas halto.
P’esey, cu e fin di haya con ta bay cu e cambionan temporal ey den e indicenan di incidencia di infarto di e miocardio y su relacion cu e periodonan di stress psicosocial, un grupo di cientifico Sueco a analisa e datonan di 156.690 pashent cu ta sufri e patologia aki den nan pais entre Januari di 2006 y December di 2013.
E estudio, publica recientemente den e American Heart Journal, a basa riba e hipotesis cu, na principio di luna, na principio di siman y durante e prome oranan di dia, personanan sa tin un mayor nivel di stress y tambe e indice di infarto den e miocardio lo mester ta mas halto. Na comienso di luna, por ehempel, hende mester paga nan recibonan. Dialuna nan ta laga atras e calma di fin di siman y parti mainta ta ora cu mayoria hende ta wordo hiba na nan trabao, un di e mayor causnan di stress.
“E bida moderno ta desafiando e ritmo circadiano cu su luz artificial y un tempo di soño arbitrario, ya sea cu pasobra nos mester traha shift na trabao, nos tin cu lanta tempran mainta riba dialuna of nos ta drumi laat preparando pa pasco.
Algun investigacion previo ta sugeri cu hasta cambionan light den tempo di e sociedad, ta precede na e aumento di e tasanan di infarco den e miocardio,” e estudio ta afirma.
Pa evita cu e analisis ta resulta afecta pa otro factornan cu por yega na incidi den tasanan di infarto, e investigadornan tambe a inclui datonan manera e temperatura ambiente di e momento ora cu e pashent sufri e infarto, e polucion di aire y awo caminda e persona ta drenta den e servicio medico.
Cu e informacion aki na man, cientificonan ta conclui lo siguiente: dialuna ta e dia cu mas infarto ta ked presenta, mientras cu diasabra ta e dia caminda cu tin menos caso. En cuanto e fechanan cu mayor incidencia di infarto, dia 28 di cada luna tin e tasa mas halto, mientras cu dia 18 tabata tin e tasa mas abao. Finalmente, e luna cu mayor caso di infarto ta December y e menos sa ta Juli.
Aunke e estudio ta aclarea cu no por afirma cu e stress psicosicial ta efectivamente e causa directo di e patologia aki, ta kere cu tin un relacion. “E variabilidad observa di e infarto di miocardio den diferente periodo di tempo durante e aña por ta sistematicamente relaciona cu nivelnan di stress psicosocial,” e cientificonan a conclui.
Fuente: www.elespectador.com