DEN HAAG, Hulanda – E cinco agentenan cu tabata envolvi den e aresto fatal di Mitch Henriquez, aña pasa na Den Haag, hefe di polis e tempo ey, Bouman di Nationale Politie, a dunanan e garantia cu nan no lo wordo kita for di trabao. Eenheid Den Haag di Nationale Politie a confirma e noticia aki na NRC. E corant a cita for di documentonan confiabel, caminda cu Bouman a priminti e agentenan cu nan lo keda polis, “kico cu pasa.”
Bouman a expresa su garantia na e hefe di e Unidad Regional di Den Haag, cu a suspende e cinco agentenan aki, ora cu nan a wordo haci sospechoso. E ex hefe di polis, no kier a reacciona.
Presidente di e sindicato di polis NPB, Jan Struijs no tabata mucho contento ora cu e agentenan di Den Haag, a bis’e siman pasa riba e promesa aki. El a yama esaki “hopi straño.” “E tabata tin un autoridad moral y formal y esaki a influencia e caso aki,” Struijs a bisa NOR Radio 1 Journaal. “Polisnan merece tur sosten, pero no speransa falso.”
Segun e corant, Bouman lo a priminti den un combersacion riba 17 di September 2015, cu e “consecuencianan financiero di e suspencion lo wordo reverti” y nan lo haya bek nan badge. Den e documentonan cu NRC a haya, tin papia aki di “promesanan fuerte”. Despues di dos siman cu e combersacion aki a tuma luga cu e agentenan, Bouman a laga sa cu e lo retira.
Minister van der Steur di Siguridad y Husticia, kier despues cu tur investigacion wordo conclui, bay analisa e promesa di Bouman. “Pero pa manda un carta asina no ta bon,” el a bisa.
Luna pasa Ministerio Publico a dicidi di bay persigui dos di e cinco agentenan pa nan envolvimento di e aresto di Henriquez. Nan ta wordo acusa di “doodslag”. E agentenan a haci uzo di un nekklem y tambe di pepperspray. Henriquez a fayece door di a stik.
Fuente: NOS.nl