Haya un camber pa studiante na Utrecht ta dificil pero no imposibel

0

Den e tarea di Arubahuis pa duna mas informacion posibel tocante e situacion cu cambernan pa studiante, nos ta bai tira un bista riba e ciudad di Utrecht. Pa haya camber na Utrecht esaki ta hopi dificil, pero e NO ta imposibel. Studiementor na Utrecht, Reina Danje a compila informacion riba e asunto aki pa nos por comparti esaki cu e muchanan cu ta planea pa bin studia na Utrecht.

E razon dicon ta hopi dificil pa haya un camber na Utrecht ta debi cu tin hopi studiante y tiki camber; ta existi un wachtlijst y Utrecht conoce e systema di “hospiteren” cu ta encera cu un studiante cu ta bin na remarca pa un camber ta wordo invita pa un asina yama “hospiteeravond”, na unda e studiantenan cu ta bibando den e compleho of e cas ta dicidi ken ta haya e camber.

Mirando cu na Utrecht mes ta dificil pa haya un camber ta recomendabel pa busca tambe den vecindario di Utrecht por ehempel na Nieuwegein, IJsselstein, De Bilt, Bilthoven, Zeist, Amersfoort, Vianen y Houten.

Hopi studiante Arubiano ta prefera un camber cu su mesun baño y cushina. Esaki ta posibel y bo ta papia aki di un studio di cual e prijs di huur pa luna ta 700 euro of mas. Alabes hopi biaha un persona (p.e. bo mayornan) lo mester para garantia pa e pago di huur. Den e caso di un camber den un compleho di studiante bo lo mester comparti baño y cushina, pero di otro banda e huur ta barata y bo ta cera conoci cu mas hende y casi semper tin un persona na cas.

Pa loke ta Utrecht tin algun canalnan pa busca camber. Esun mas conoci ta Stichting Studentenhuisvesting (SSH). E fee ta 12,50 euro y bo por inscribi for di bo 16 aña. Mas tempran bo inscribi bo mes mas bo chens ta bira grandi cu bo por haya un camber. Banda di un inscripcion na SSH ta recomendabel pa inscribi bo mes tambe na Woningnet. Si bo combina e inscripcion cu esun na SSH bo ta paga unicamente 22,50 euro, enbez di 30 euro pa Woningnet so.
Ta bon pa check e websitenan di e instancianan aki bon pa e condicionnan di inscripcion. Tambe via Facebook tambe bo por busca camber. Un otro opcion ta haci uso di makelaarnan.

Ta recomendabel pa inscribi bo mes na diferente instancia cu ta ofrece camber. E ta un inversion, pero e por yudabo ta haya un camber mas lihe. Corda tambe pa cuminsa na tempran, asina cu bo a pensa di bin studia na Hulanda.

Nos ta spera cu e informacion brinda aki por yudabo na bo preparacion pa bo estudio na Hulanda y en especial na Utrecht.

Un lista di e websitenan ta riba e website di Arubahuis bou di e capitulo Onderwijs.

LEAVE A REPLY

Please enter your comment!
Please enter your name here