HONOLULU, Hawaii- Habitantenan di Hawaii diamars a rush pa cumpra awa den boter, sopi instantaneo y papel di wc door di e menasanan di awasero fuerte, inundacionnan repentino y olanan halto causa pa un horcan impredecibel di trayectorio incierto.
Servicio Meteorologico Nacional diamars a emiti un ‘Hurricane Watch’ pa partinan di Hawaii, Mauii y e otro islanan chikito, cual ta nifica cu den e proximo 48 hora nan lo por ricibi bientonan cu forsa di tormenta tropial. Ta posibel cu esaki wordo extende despues pa Oahu y Kaui.
“Ta pronostica cu e siman aki horcan Lane a move di manera peligroso cerca di e islanan di Hawaii ainda como horcan. Esaki probablemente lo ocasiona bientonan fuerte y inundacionnan repentino potencialmente causa pa awaseronan torencial”, e servicio climatologico di e Centro d Horcan pa Pacifico Central.
E tormenta tabata move bay west, pero ta spera cu diaranson e lo bira bay noordwest cu direccion Hawaii. Tin incertidumbre den e trayectorio di Lane, ya cu no sa si e ta move bay noord of zuid, segun e meteorologo Gavin Shigesato.
“Ta demasiado pronto pa determina cu confianza cual, si algun di e islanan Hawaiiano principal lo por resulta impacta directamente pa Lane”, e servicio a bisa.
Incluso si e centro di Lane no subi tera, e islanan lo por resulta afecta cu awasero y biento. E funcionarionan a haci un yamada na e habitantenan pa probecha diamars y diaranson pa prepara nan mes.
A pidi e poblacion pa nan tin nan EHBO kit na man y “saca placa. Nan mester corda, cu si lus bay, e ATM machinenan tampoco lo funciona”.