PORT-AU-PRINCE, Haiti – Haiti ta biba diasabra e hornada di reflexion na bispo di e eleccionnan di diadomingo, posponi den cuater ocasion, e ultimo biaha na October ultimo debi na e devastacion causa pa horcan Matthew.
E Haitianonan lo eligi mañan entre 27 candidato cu a postula nan mes pa e Presidencia di e pais y tambe mester scoge 16 senador y 25 diputado pa completa e Parlamento (bicameral).
Jovenel Moise, di e Partido Haitiano Tet Kale (PHTK); Jude Celestin, di e Liga Alternativa pa Progreso y Emancipacion Haitiano (Lapeh); Moise Jean Charles, di e Plataforma Pitit Dessalines y Maryse Narcisse, di e Famia Lavalas, ta e aspirantenan cu mayor opcion.
Si ningun di e candidatonan presidencial ta obtene e 50% mas un voto, nan lo realisa un di dos buelta dia 29 di Januari proximo, aunke por lo menos te cu un siman despues di e eleccionnan di mañan no lo conoce e prome resultadonan.
Poco ora pa su apertura, premira pa 6’or di mainta ora local, den e colegionan electoral tabata tin bastante actividad, debi na e acondicionamento di e espacionan, na e simulacronan di votacion y na e yegada di e materialnan electoral cu e Mision di Nacionnan Uni pa Stabilisacion na Haiti (Minustah) wordo entrega.
E Conseho Electoral Provisional (CEP), cu ta sigura cu ya a despacha e material electoral, a insisti diasabra, atrabes di e medionan, rednan social y mensahenan di texto na e poblacion den e necesidad di acudi na urna.
E exsenador Uruguayo Juan Raul Ferreira, cu ta encabesa e mision di observacion electoral di e Organisacion di e Estadonan Americano (MOE/OEA) a recuri diverso centro di e capital, pa confirma e bon desaroyo di e trabaonan.
Ferreira tambe e exhorta e pueblo Haitiano “pa nan sali pa vota, y pa nan sinti nan mes participe di e proceso pasobra e eleccion aki ta clave.”
“Nos a mira progresonan importante cu respecto na e recomendacionnan cu nos a formula” na e autoridadnan electoral, Ferreira a splica den declaracionnan na Efe, tras di uni cu e responsabelnan di e conseho electoral.
Entre e novedadnan di e proceso aki, ta figura cu e hokinan di votacion ta garantisa cu e voto ta secreto, uzo di ink indeleble y e instalacion di un menor cantidad di mesa den cada colegio.
Ferreira a señala cu desde cu OEA a aspira pa e ta un “hornada normal, trankilo, cu no tin ningun hecho di lamenta, cu e concurencia ta e mayor posibel y cu henter mundo respeta e resultado.”
Fuente: NTN24