Diasabra ultimo 26 di November ultimo a conclui e campeonato nacional di Lionfish cu 254.15 kilo di Lionfish gara pa un grupo di buceadornan cu a yuda mantene nos rifnan liber di e pisca invasivo aki. Cu esaki a conclui e Hadicurari Lionfish Challenge 2016 cual tabata encera 2 competencia den 1 pa asina determina e team Campeon Nacional durante e luna di November cual ta e luna pa concientisacion di Lionfish.
Lionfish ta un pisca invasivo introduci for di Oceano Pacifico cu ta forma un menasa pa nos rifnan, industria turistico y di pesca. Door cu e no tin depredator natural, ta reproduci rapidamente y tin un apetit voraz, e por elimina areanan completo di otro pisca. Pesey directiva di Fundacion Centro di Pesca Hadicurari a patrocina e campeonato nacional, uniendo forsa cu otro instancianan manera Santa Rosa, Fundacion Aruba Reef Care, Jolly Pirates Aruba, pa organisa eventonan pa stimula gara y come lionfish.
E PROME COMPETENCIA:
Durante di e prome simannan di November, te 13, varios team a cuminsa trece Lionfish aden. Den e prome tanda unicamente 2 ekipo a logra registra pisca. Na di dos luga a keda, JADS Crew, di capitan Rosaura Semeleer, cu a trece 11.3 kilo di Lionfish. Na prome luga a keda Lionfish Go, di capitan Luciano Mazzeo, cu a registra 84.9 kilo di Lionfish y ademas a trece e Lionfish mas chikito (8.4) cm, como tambe esun di mas grandi, midiendo 42cm largo.
E DI DOS TANDA:
Di dia 14 te diasabra 26 ultimo e campeonato a sinti un biaha mas unda e biaha aki 6 ekipo di te 6 persona cada uno, a sali gara Lionfish pa premionan ainda mas gordo. Den e parti aki, Canicio van der Biezen di e team Aruba Watersport Center, a gara e Lionfish di mas chikito, midiendo 3.9 cm, como tambe a entrega e Lionfish mas grandi di 41.5 cm largo.
Na di 5 luga den e ronda aki a keda e team di Bob & Co, cu a trece 9.9 kilo di Lionfish. Sigui na di 4 lugar, a keda Aruba Watersports Center cu 14.1 kilo. Na di 3 luga a keda JADS Crew cu 23.25 kilo entrega. Na di dos luga a keda e team di Mourik Lions cu a entrega un total di 36.55 kilo. Na prome luga a keda indiscutiblemente Lionfish Go, kendenan a entrega un cantidad di 74.05 kilo di Lionfish den 10 dia di competencia.
CAMPEON NACIONAL:
Contando e total di e 2 rondanan a sali evidente cu e team consistiendo di Luciano Mazzeo, Patrick van Brackel, Roy Keulers y Rob Abbring, ta e campeon nacional 2016. Pa esaki nan a haya un plakkaat di honor pa 2016.
PREPARACION PA 2017:
Tur pisca gara a keda entrega pa e cushina pa publico purba, sea diasabra mes na beach of diadomingo na e evento di recaudacion di fondo di Lionfish and Wine Tasting 2016. Organisadonan ta gradici un y tur cu a contribui pa haci e luna di concientisacion exitoso, danki. Ya preparacionnan ta ser haci pa haci 2017 un aña ainda mas intensivo pa loke ta control di Lionfish, unda ta premira 4 campeonato di diferente tamaño y formato, como tambe patrocinadornan, pa for di esakinan saca e campeon nacional di Aruba den 2017 basa riba un sistema di puntuahe. Asina tambe diasabra durante di e ceremonia di premiacion, un representante di De Palm Tours y De Palm Island a haci entrega di un invitacion na e participantenan pa e De Palm Island Challenge di 2017, e prome torneo di aña. Asina e prome siman di aña habri e torneo aki ta ranca sali y termina den grandioso forma diadomingo 15 di Januari na De Palm Island. Keda pendiente pa mas informacion.