Parlamentario di partido AVP, Sra. Desiree de Souza- Croes a bisa cu despues di basta luna di carga pasenshi, porfin Green Corridor den bario di Pos Chikito ta kedando cla. Y e resultado ta mas bunita cu a spera. “Klinkersnan a keda masha nechi tur caminda, resalta asina e bunitesa di nos bario”
For ora drenta Pos Chikito, di pariba, esta di Savaneta, por mira e cambio positivo cu Green Corridor ta trece cun’e. Ambos banda di caminda, pazuid y panort, a haya su stupinan di klinker y un caminda bunita asfalta. E casnan pega cu caminda cu añanan tabata guli stof, awor ta mira nan cas subi di balor tambe.
Tambe DOW a probecha y cuminsa asfalta mas caminda den bario di Pos Chikito y Sabana Basora. Tur caminda di santo lo bira caminda di asfalt pa asina caba tambe cu stof constante tur caminda. E caminda di rotonde bay noord den Sabana Basora pa Franse Pas, tambe lo haya pronto asfalt nobo, segun promesa di Minister Benny Sevinger na su persona durante tratamento di Presupuesto 2017. Pues mas tarda luna di April Pos Chikito y Sabana Basora por ta feliz ora e Green Corridor keda cla completamente y tur caminda haya asfalt.