Recientemente e competencia di Bola 10 organisa pa e federacion di biyar FEBIAR a yega su gran final unda e miho hungadornan den bola 10 mester a topa otro pa asina defini e ganado maximo. Mester bisa cu un bataya fuerte a ser hiba den club di Polis, Pova pa asina mira ken por yama su mes e miho atleta den e categoria aki y bay cu e titulo maximo cas. Remarcabel ta cu e disciplina di Bola 10 ta esun di mas complica mirando su grado di dificultad debi cu tur bala mester cay canta y den e secuencia corecto.
Na final di e anochi largo aki e resultado oficial a keda conoci unda e campeonato absoluto y alabes nacional di Bola 10 di Aruba a resulta e hungado Gunnar Leonardo cu a finalisa dilanti di Marc Farro cu e keda na di dos luga, Angelo Tromp na di tres luga, Emil Kock na un di 4 luga. Di 5 te cu 8 lugar a keda Richard Wolf, Martin Appeldoorn, Noe Camera y Jonathan Maduro.
Mesora e federacion di FEBIAR a anuncia e 3 atletanan di biyar cu lo representa Aruba den Panamericano di biyar 2017 cu lo tuma luga den luna di Augustus na Buenos Aires, Argentina.
E tres atletanan aki lo ta Marc Farro number 1 di ranking despues di 6 evento, Gunnar Leonardo number 2 di ranking & Campeon Nacional bola 8 & 10 y Jason Kock number 3 di ranking & Campeon Nacional bola 9. Un pabien sigur na Gunnar Leonardo como tambe na Marc Farro y Jason Kock cu nan titulonan y alabes ta e atletanan di biyar cu lo representa Aruba den e Panamericano di biyar na Argentina.
Lotto, e Loteria di Aruba pa medio di Comision di Subsidio ta subsidia tur e campeonatonan di biyar organisa pa FEBIAR.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio