Dialuna 9 di januari 2017 a tuma luga un Reunion Tripartiet entre e Parlamentonan di Aruba, Corsow y Sint Maarten. Parlamentario señor Guillfred Besaril conhuntamente cu señores Juan (Ady) Thijsen y Chris Romero, a representa Fraccion di partido MEP den e delegacion Arubano. Sr. Besaril a declara lo siguiente riba e desaroyo di e reunion.
“Durante e siman tras di lomba a tuma luga un reunion Tripartiet entre Parlamentonan di Aruba, Corsou y St. Maarten. E Tripartiet aki ta di suma importancia pa e intercambio y desaroyo di e tres paisnan di Caribe Hulandes alabes e ta un momento di preparacion prome cu e reunionnan den cuadro di e Inter Parlamentair Koninkrijksoverleg (IPKO).
Durante e reunion aki a toca varios topico di interes comun manera entre otro enseñansa, e situacion na nos pais bisiña Venezuela, introduccion di castigo minimo y oportunidadnan economico entre e paisnan den Reino Hulandes Caribense.
Riba e agenda tambe tabata tin algun topico cu ya pa algun tempo caba ta den discusion entre e diferente paisnan por ehempel e geschillenregeling y cuido medico”.
Sr. Besaril a duna di compronde cu su enfoke tabata primordialmente riba e introduccion di castigo minimo, pues pa duna na conoce cua te delitonan specificamente y e motibo cu a impulsa e pensamento di un posibel introduccion di castigo minimo den nos codigo penal.
Sr. Besaril a sigui elabora. “Comunidad Arubano ta preocupa y disgusta cu e sistema actual di castigonan cu ta wordo aplica den por ehempel casonan di maltrato y abuso contra mucha, maltrato y abuso domestico y crimennan violento (manera atraco). Ta pa e motibo aki nos a sinti cu tabata di vital importancia pa scucha di nos rumannan den Reino kico ta nan situacion y pensamento riba e punto aki. Ademas a probecha di e plataforma pa comparti e preocupacion di nos Fraccion pa loke ta e circulacion alarmante di arma di candela na Aruba”.
Un tema cu Sr. Besaril y demas miembronan di e delegacion Arubano a elabora extensamenteriba dje, ta e situacion di conectividad entre e islanan. Tin un solo aerolinea cu ta bula y conecta e diferente islanan den Caribe Hulandes cu otro, pero dicho aerolinea ta pasando den temponan sumamente dificil. “Ta importante pa percura pa e islanan tin un bon conexion cu otro. No solamente pa e parti economico, sino tambe pa e parti social familiar cu semper a existi entre e islanan. Hopi di nos na Aruba tin famia cu ta biba riba e diferente islanan. Ta p’esey e ta importante pa e servicio keda garantisa. Ademas di garantisa e servicio mester mehor’e tambe!
E retrasonan absurdo cu tin den actualidad mester stop, ya cu e ta causando dañonan ireversibel. A para bira masha normal cu un biahe di 15 minuut, ta termina den un odisea desagradabel di entre 3 pa 6 ora prome cu por bula y yega e destinacion final. Motibo suficiente pa propone na sondea e posibilidad pa un tipo di “City Hopper” entre e diferente islanan pa di e forma ey garantisa e conectividad y na mes momento stimula competencia sano cu na final mester por conduci na un mehoracion di e servicio actual.
E politiconan na final di e reunion Tripartiet tabata unanime riba e punto cu e reunionnan entre e islanan mester sucede cu mas frecuencia y no solamente den cuadro di IPKO.
Tin hopi posibilidadnan interesante riba diferente tereno pa e islanan y ta danki na e tipo di reunionnan aki nos ta realisa cua te oportunidadnan concretamente y nan embergadura” Sr. Besaril a termina.