Minister di Husticia, Sr. Andin Bikker, ta duna su punto di bista riba e controlnan actual di Guarda nos Costa.
E Minister ta sinti e controlnan di Guarda nos Costa ta bayendo riba bon caminda. No obstante, hopi hende di Venezuela ta saliendo for di nan pais cu ta sufriendo un crisis grandi. Hopi ta opta pa busca refugio na Aruba y esaki ta inclui di cualkier forma, incluyendo forma ilegal. Pa casonan asina di entrada ilegal, Minister Bikker ta mustra cu tin dos metodo actualmente pa aumenta control. E prome ta cu nan ta ekipando Guarda nos Costa y intensivando e controlnan. E di dos ta cu desde Juni a duna autoridad bek na Cuerpo Policial pa nan tambe haci e tipo di controlnan aki. E parti fastioso ta cu bo no por wak na e aspecto fisico di un persona si e ta realmente ilegal of no. Pa esaki, e Minister a pidi e ciudadanonan comprension pa ora autoridadnan concerni haci nan trabou. Pues a sosode casonan unda cu autoridadnan ta acerca e personanan aki pa pidi nan permiso cu ta comproba cu nan tin un estadia legal y e personanan aki ta sea sinti nan mes ofendi of ta crea un problema pa no coopera cu autoridadnan.
E Minister ta sigui splica pa ley tur e personanan aki mester cana cu nan permiso. Pero pa esunnan cu ainda no tin e dor di e retraso na DIMAS, nan a bin cu e plan pa ekipa Guarda nos Costa y Cuerpo Policial cu un aparato cu ta link nan na informacionnan den e sistema unda nan por mira si e persona a aplica pa un permiso y si dor di e retraso na DIMAS no tin su permiso ainda.