Directie Volksgezondheid, DVG, tin mas of menos 170 empleado trahando den 10 diferente seccion. Aunke nan ta traha cu e mesun meta, nan no ta topa otro cu frecuencia y no tin un oportunidad of evento fiho tur aña pa reuni pa cera conoci cu coleganan nobo tampoco.
Den cuadro di varios desaroyo nobo y e necesidad pa trece tur colega hunto periodicamente, e grupo conoci como Grupo di Trabou ARBO den Directie Volksgezondheid a organisa un dia di ‘teambuilding’. E actividad a inclui un presentacion riba e topico “teambuilding” ofrece pa Joanne Croes di Departamento di Recurso Humano (DRH), sigui pa un “icebreaker” pa coleganan siña conoce otro miho. E coleganan mester a pinta un cuadra cu ta forma parti di un cuadra mas grandi y cada cuadra mester tin coherencia y conexion. Despues di merdia e coleganan a participa na un competencia dibertido di “seso sport”.
Grupo di Trabou ARBO, consistiendo di Ugina Thomson, beleidsmedewerker, Lativa Mercera di Dienst Besmettelijke Ziekten; Clayton Croes di GKMB y Irene Croes di Veterinaire Dienst a percura pa un programa cu tur hende a gosa hopi di dje.
Director di DVG, drs. Jerry Staring a splica cu e ta corda algun aña pasa ora cu a organisa un “teambuilding exercise” riba beach cu a resulta den un exito grandi. Tambe el a elabora cu tin un necesidad pa trece tur colega hunto periodicamente, por lo menos un biaha pa aña, pa un tipo di actividad asina. El a keda contento cu e combinacion di diberticion y educacion; e ultimo aki particularmente pasobra e ta fungi como un sesion di motivacion.
Durante di e actividad tambe a para un rato keto pa honra e coleganan cu tabata cumpliendo aniversarionan di hubileo trahando cu DVG. Staring a bisa cu DVG ta hopi orguyoso como cu mayoria di e coleganan aki a traha tur e añanan ey cu DVG so, pues ta refleha un team cu ta hopi leal y cu hopi experiencia y e ta duna nan credito como esunnan cu a contribui tambe pa un gran parti cu e desaroyo di DVG.
Departamento di Salud Publico Aruba ta pasando pa un cambio di identidad y cultura, ta tumando cierto pasonan pa crea un documento di strategia y desaroyo nobo, den cual a identifica e balornan clave pa DVG, incluyendo transparencia y respet pa otro.
Recientemente cu introduccion di e logo nobo di DVG tambe a reenforsa e pensamento di 1 solo departamento, pues cu tur seccion ta uza e mesun logo y colornan pa identifica e organisacion. Jerry Staring a subraya cu e necesidad t’ey pa den un ambiente positivo intercambia di idea y socialisa y e intencion ta pa tene un actividad di teambuilding como parti di e agenda anual di DVG, mas ainda cu na 2017 ta recorda cu 100 aña pasa a cuminsa cu Servicio di Salud na Aruba, esta un gezondheidsdienst. E celebracion aki ta bay ta un parti cu sigur mester ta den e programa pa e coleganan y comunidad na 2017.
Finalisando, Staring a gradici y felicita e coleganan cu ta celebra nan hubileo na DVG. Nan ta Eveline Tromp (25 aña), Antoine Croes (30 aña), Celestina Semeleer (35 aña), Mary Croes (40 aña), Geraldine Ismail (35 aña), Joan van Heyningen (30 aña), Edwina Danies (25 aña), Roland Geerman (25 aña), Maria M. Geerman (35 aña), Camilia Z. Solognier (35 aña), Edwin Leest (40 aña), Nicomedes John (25 aña), Ludwig Lacle (25 aña), Remberto Lacle (25 aña), Dilia Ventura (25 aña) y Ludmila Geerman (25 aña).