Salon ‘Gouden Bal’ di Marinierskazerne tabata sede un biaha mas pa ceremonia di graduacion di SVT Traject/Formacion Social. Mayornan y famia, docentenan y representantenan di oficina di Formacion Social, como tambe di Cuerpo di Marina Hulandes tabata presente pa mira momento cu cada hoben participante a ricibi su certificado. Despues di a pasa 4 luna di entrenamento militar y 8 luna di cursonan intensivo hunto cu stage, e hobennan cu un tempo no tabatin mucho perspectiva positivo pa futuro, awo ta cla pa cuminsa un bida nobo.
Esaki ta graduadonan di Grupo #9 di Formacion Social, un proyecto cu ta iniciativa di Prome Minister Mike Eman y cu a cuminsa un poco mas di cuater aña pasa. E obhetivo di Premier Eman tabata y ta pa duna hobennan cu no a gradua y no tin un trabou fiho, e hermentnan di disciplina, educacion y motivacion pa cambia e rumbo di nan destino pa uno mas probechoso.
Esnan cu a logra completa e aña di Formacion Social ta: Bono-Vox Standford Hassell di 19 aña kende ademas di e estudionan, a core stage como mecanico na Marinierskazerne; Joshua Marlon Kock di 19 aña a traha pa 8 luna na Electra Spark como ayudante di electricista; Edmard Jay-Quiohn Lampe di 20 aña a haci su stage den e departamento di Recreation di Marriott Aruba Resort & Stellaris Casino; William Alejandro Quant di 21 aña a haya experiencia na A&H Technical ervices N.V. como ayudante di tecnico di airco; y Gian Pierre Rodriguez di 21 aña a traha pa 8 lucha como parti di e ekipo di Maintenance di Divi Aruba Phoenix Beach Resort.
Minister di Husticia Arthur Dowers tabata presente den nomber di Prome Minister pa felicita e grupo completo di graduado, como tambe e docentenan, guia y personal di Formacion Social y Cuerpo di Marina Huandes pa e exito obteni. Nan famia, pero tambe pais Aruba ta orguyoso di e logro aki y ta spera di por sigui conta cu nan como ciudadanonan ehemplar di nos comunidad.
Mientras cu Grupo #9 a finalisa, Grupo #10 ta na mitad di nan trayecto y inscripcion ta habri pa Grupo #11 cu ta inicia na fin di maart proximo. Pa mas informacion por bishita e pagina di Facebook ‘Formacion Social – SVT’, yega personalmente na e oficina ubica na Marinierskazerne na Savaneta of yama na 522-5352/ 522-5545.