Tres bus y un caravana di auto cu participante di tur edad a disfruta di un Expedicion Arqueologico diferente y aventuroso, e biaha aki den e area di San Nicolas. Ya pa tres aña consecutivo Museo Arqueologico ta ofrece den Luna di Monumento e actividad masha gusta aki, unda ta duna e oportunidad pa bishita sitionan arqueologico conoci y no conoci y unda tur cu ta interesa por intercambia cu e expertonan den arqueologia ‘on the site’. E reaccion mas scucha diadomingo ultimo, tabata pa por fabor sigui ofrece e actividad aki pa publico.
Cu hopi animo y den bon ambiente a haci e excursion special aki. Riba tur bus tabata tin boluntario di Museo presente cu tabata yuda guia e ‘tour’ aki, como tambe tabata percura cu den un of otro forma tabata tin entretenimiento pa e participantenan durante e recorido. Mircla Nava di Stichting Monumentenfonds, Renwick Heronimo, curator di Fundacion Museo Arubano (FMA) y e ‘mastermind’ di e exposicion di Museo di Industria y Angelo Tromp, director interino di Museo Arqueologico a conta for di nan area di experticio. Artista Beach Lama a deleita un y tur cu poesia, canto y storianan, Duane Amedè, integrante di Cozmic Stonez a team up cu stagiair di Museo Cristy Werleman pa trece algun cantica acoustico pa publico y artistanan Paula y Daniel, trahando pa Stichting Rancho a conta y mustra nan portfolio di e ‘Murals’ cu nan a pinta den “Rancho”, e bario di Museo Arqueologico.
Museo ta hopi agradicido na tur cu a yuda haci e di tres edicion di e expedicion arqueologico atrobe un exito rotundo. En especial ta gradici Stichting Monumentenfonds y su team di boluntario fabuloso, FMA y coleganan di Museo di Industria y Museo di Comunidad cu a haci nan esfuerso maximo pa den un weekend ya hopi druk caba cu ‘Aruba Art Fair’ a habri nan porta y a guia nos participantenan asina treciendo mas historia di nos dushi isla na bida. Un danki grandi tambe ta bay pa Stichting Rancho y participantenan di Tempo pa Click cu a subi bus cu nan camera pa documenta henter e expedicion. Mas cu claro Museo Arqueologico ta hopi agradeci na su team fantastico di boluntario (hoben) cu a traha masha duro mes pa hasi e expedicion uno hopi leuk y ‘safe’ pa un y tur. Un danki tambe na Arubus, su chauffernan hopi anima y responsabel, y tur otro persona of instancia cu na un forma of otro a contribui.