Grand Master Chaco Cornelio a biaha pa Rusia

0

E dianan 4 pa 6 di Augustus lo tuma lugar na Moscu, Rusia e prome edicion di e Grand Prix di Taekwondo unda e miho atletanan di tur parti di mundo lo bin hunto pa asina bataya contra di otro den e deporte di combate aki. Aruba su referee internacional den e deporte di taekwondo y considera un di e miho referee di taekwondo na mundo, Grandmaster sr. Jose “Chaco” Cornelio tambe lo forma parti di e magno evento aki. Recientemente Sr. Cornelio tabata na e campeoanto mundial di taekwondo cu e tuma lugar na Mujiu, Sur Korea. Pa sr. Chaco Cornelio e invitacion ricibi tabata un honor pa su persona.

“Pami e ta un orguyo cu cada bes mi haya e oportunidad di para referee na un evento grandi di taekwondo manera den e caso aki den e Grand Prix na Rusia. Cada bes cumi referee y para riba e mat ta Aruba su nomber ta sali riba e pantaya y esey ta un significacion hopi valioso. Aruba su nomber ta wordo mira pa miyones di hende rond mundo y mi persona tin e honor di ta un representa di nos dushi isla. Sigur un danki na henter e directiva di Lotto cu ta apoya mi persona den esaki”, Sr. Cornelio a bisa.

Den nomber di Minister di Deporte, Sr. dr. Alex Schwengle y St. Fundacion Lotto pa Deporte , Sr. Flavio Faneyte, miembro di directiva, a bisa di ta masha contento cu Lotto pa Deporte ta duna nan aporte na un gran persona den e calidad di Grandmaster sr. Chaco Cornelio cu ta un digno representante di nos pais specialmente nos deporte y e deporte di taekwondo. Mundialmente Sr. Cornelio ta reconoci como Aruba su referee internacional di taekwondo. Sr. Cornelio ta un branding pa Aruba.

Den pasado sr. Cornelio a para referee na weganan grandi manera Weganan Olimpico, Panamericano, Centro Americano y del Caribe y diferente Mundialnan di taekwondo sin conta otro torneonan grandi na nivel internacional.

Na e Grand Prix di Taekwondo di Moscu, Rusia mas cu 220 atleta di 53 pais lo bringa den e sala di USK CSKA Basketball Arena na Moscu. E Moscu Grand Prix 2017 ta e prome di e 4 di e serie cu lo wordo organisa cu lo inclui e mihonan di mundo. E di dos edicion di e Grand Prix lo tuma lugar na Rabat, Morocco den luna di september esta di 22 – 24.

Di aki banda nos ta desea Grand Master Chaco Cornelio tur clase di exito den e Grand Prix 2017 di Moscu, Rusia.
Pesey publico en general sigi cumpra Lotto, E lotteria di Aruba, pa cambia bida di nos deportenan.