Michella Steenvoorde-Lacle di e plataforma POR, E Forsa Nobo ta indica cu tin un cantidad di maestro cu ta wardando pa añanan largo riba kindertoeslag. E departamento cu mester procesa e peticion pa kindertoeslag, DPS (Dienst Publieke Scholen), ta ricibi esaki for di e maestronan y ta manda na su turno e documentacion pa e Minister concerni duna su aprobacion.
Un maestro despues di 2 aña di ta wardando riba kindertoeslag a dicidi di bay un biaha mas DPS personalmente pa puntra ki dia por spera un pago. Ya caba dos aña pasa a entrega tur documento concerni, pero ora a yama puntra, nan a bisa cu nan no por haya ningun peticion, dus tin cu manda e documentonan aden atrobe.
Tur esaki ta tuma tempo y naturalmente ta costa extra placa ya cu bo tin cu bay censo pa pidi y paga pa e documentonan concerni. No obstante a paga y a entrega tur e documentonan un biaha mas (e biaha aki a pidi pa copia cu fecha pa garantisa cu nan no ta perde atrobe).
Lunanan a pasa y e docente a dicidi di bay puntra atrobe ki dia por spera un pago. Pa sorpresa nan a bisa cu nan mester copia di carchi di AZV di e yiunan, algo cu nan por a pidi of indica cu falta e di dos biaha cu a entrega tur e documentonan.
Despues di algun siman cu a entrega e copia di AZV a bay personalmente un biaha mas, pa puntra ki dia por spera un pago. Aki e representante na DPS a enfatisa categoricamente: “Minister tin cu firma pa acord’e, e por dura lunanan of añanan”
Den e frustracion a comparti e caso riba private wall di FB. Aki riba mas hende a expresa e mesun storia. Algun tin 2 aña wardando, algun tin un aña wardando, pero cu nan tambe a pasa cu documento a disparce, diripiente nan falta papel pa entrega, y otronan cu no ta haya ora di porta, ya cu nan ta wordo corta na momento cu nan yama. Enfin e storianan tabata hopi similar. Te hasta consehero di Minister concerni cu e cartera di Educacion a envolvi su mes den e discusion y a bisa cu ningun documento a yega desk di minister.
E situacion ta inaceptabel, un departamento cu tin asina tanto “petten”, manera DPS, no ta suppose di ta “onderbezet”. Si tin personeel te kort pa kico no por uza servicio di uitzend kracht pa yudanan cu ‘achterstalig werk’? Ta parce cu prioridad ta otro caminda. Ta un derecho Internacional di un mucha pa ricibi su toeslag, manera debe ser.
A yega tempo pa cuminsa pensa mas pragmatico y busca solucionnan pa tipo di problemanan aki. Specialmente comunicacion cu ta un sistema esencial di preveni mal entendimento y ta vital pa un departamento asina importante den bida di un docente.