BRUSSEL, Belgica – “E boet a wordo calcula riba e base di e balor di e ingresonan cu Google a obtene cu su servicionan di comparacion di prijs den 13 pais Europeo,” unda cu e ta ofrece su servicio Google Shopping, e Comision a indica.
Den mayoria di e paisnan Europeo, e motor di buskeda tin un quota di mercado superior na 90%.
E mayor multa Europeo te awor aki pa abuso di posicion dominanbte lo a ascende na 1.060 miyon di Euro y a wordo imponi na 2009, e fabricante Mericano di microprocesador Intel.
E multa ta cera un proceso di shete aña, cu a cuminsa ora cu gruponan Mericano Microsoft y TripAdvisor a denuncia nan rival Google na Brussel.
“Loke Google a haci ta ilegal cu respecto na e leynan di competencia di Union Europeo, el a impedi cu otro companianan competi den base di nan merito y nan innova,” e Comisario di Competencia, Margrethe Vestager a bisa, cita den un comunicado.
“Vooral ta impedi cu e consumidornan Europeo ta beneficia di e posibilidad real di eligi servicio y probecha plenamente di e innovacion,” el a añadi.
Google a reacciona expresando su “desacuerdo” cu e multa y a bisa cu nan ta studiando na presenta un recurso. “Respetuosaente nos ta den desacuerdo cu e conclusionnan anuncia awe. Nos ta bay studia e decision di e Comision detayadamente y nos ta considerando apela,” nan a indica den un comunicado.
90 dia di plazo
Menos cu un aña pasa, e comision Europeo a multa un otro gigante Mericano, Apple, door di a beneficia di bentahanan fiscal ilegal na Irlanda y a toca na nan debolbe mas di 13 mil miyon di Euro na Dublin.
Ademas di e multa, e Comision Europeo tambe a pidi Google diamars, pa e pone fin den un plazo di 90 dia na e practica aki bao di menasa di multanan nobo di hasta un 5% di e facturacion medio diario na nivel mundial di Alphabet, e compania madre di Google.
E investigacion riba Google Shopping ta remonta na 2010, despues cu Microsoft y TripAdvisor a denuncia nan rival na Brussel.
Na April di 2015, e Comision a remiti un “pliego di cargo”, e ekivalente di un acusacion, na e compania, cu a reforsa un biaha mas na Juli di 2016.
Segun e compania, nan servicio Google Shopping vooral, ta un servicio publicitario y ta sigura cu e consumidornan cu kier cumpra, ta uza Amazon hopi mas, cu segun Google, ta representa mita di e mercado di buskeda pa cumpra riba e mercado Europeo.
E decision di UE contra un compania Mericano por pone mas stress ainda entre Brussel y Washington desde e yegada di Donald Trump na e Cas Blanco, ante e proximo reunion di G20 na Hamburg (Alemania) dia 7 y 8 di Juli.
E expresidente Barack Obama ya a critica e actitud di Brussel pero e comisario Europeo, Margrethe Vestager semper a afirma cu e no ta tene na cuenta e nacionalidad di e companianan sanciona.
UE tin abierto otro dos caso contra Google, pero abuso di competencia, uno riba su plataforma publicitario AdSense y otro pa su sistema operativo Android.
Fuente: www.elespectador.com