Gobièrnu di Kòrsou huntu ku akshonistanan i gerensha di InselAir a pone forsanan huntu pa asina garantisá e konekshonan aéreo ku ta krusial pa Kòrsou. Ku esaki ta hasi InselAir finansieramente i operashonalmente salú i fuerte bèk. Partidonan a firma un akuerdo riba djabièrnè 27 di yanüari 2017 kaminda Gobièrnu bou di sierto siguransa i kondishonan ta otorgá un fiansa na InselAir. Ambos partido tin konfiansa ku e akuerdo ku a firma, ku ta resultado di kombersashonnan sumamente intensivo, lo krea un bon base pa e meta ku ke alkansá.
Pa Gobièrnu ta di importansia ku e aksesibilidat i konektividat di Kòrsou ta keda garantisá, kaminda seguridat ta na promé lugá. Tambe ekonomía, generashon di divisa i empleo na Kòrsou ta depende di un alto grado di koneskhonnan aéreo konfiabel ku paisnan den nos besindario.
Basá riba e akuerdo aki Gobièrnu di Kòrsou ta otorgá un fiansa di 33 mion florin, ku lo keda pagá konforme e ehekushon di un plan di stabilidat.
Komo seguransa riba e fiansa, Gobièrnu ta optené entre otro e derechi riba propriedat (na Hulandes ‘pandrecht’) i usufrukto (derechi di hasi uso i sakando e benefisionan, na Hulandes ‘vruchtgebruik’) di 51% di akshonnan den e kompanianan ku ta forma parti di InselAir. Ku esaki Gobièrnu ta obtené tur e derechinan di un akshonista regular sin bira doño di e kompania.
Gobièrnu i e akshonistanan aktual di InselAir kada unu ta nombra dos komisario den e hunta di komisario di InselAir. E di sinku komisario, ku alabes ta okupá e puesto di Presidente Komisario, ta keda nombrá konhuntamente. E funshon di Presidente Komisario lo keda okupá dor di sr. dr. José Jardim, ekonomista i èks Minister di Finansa di Kòrsou. Su ekpsertisio finansiero i eksperensia gubernamental lo duna un gran aporte pa e restrukturashon di e kompania.
Banda di esaki e partidonan a palabrá ku e tim di maneho lo keda fortifiká ku dos direktor statutario, konforme proposishon di Gobièrnu. Esakinan ta e presidente ehekutivo i e Chief Financial Offcier (CFO). E presidente ehekutivo ta guía e tim di maneho i ta representá InselAir.
Sr. Gilles Filiatreault a keda apuntá komo presidente ehekutivo. Sr. Filiatreault tin eksperensia internashonal ámplio den e indústria di aviashon. Sr. Filiatreault tin eksperensia práktiko den su pais di orígen, Cánada i tambe na Merka, Sentral i Sur Amerika, region di Karibe, Oropa Oriental i Wèst Afrika. Sr. Filiatreault a spesialisá den inisio i restrukturashon di kompanianan di aviashon, tantu pa loke ta trata transporte di pasahero i karga.
E tim di maneho lo finalisá e plan di stabilidat pa fin di febrüari 2017. E plan di stabilidat aki lo tin ku mustra kon InselAir por normalisá mas lihé posibel, resultando den un kompania lukrativo. A base di e plan di stabilidat lo palabrá e detayenan di e finansiamentu, ku lo kana paralelo ku e ehekushon di e plan. Un promé pago di 3 mion florin a keda pagá den luna di desèmber di 2016 komo adelanto riba e akuerdo aki. Awe a prosesá e di dos pago di 5.6 mion florin pa luna di yanüari 2017.
E tim di maneho, konforme e akuerdo, tin ku formulá un business plan mas detayá den tres luna i laga e hunta di komisario aprobá esaki. E business plan ta enserá e strategia i tambe e metanan operashonal i finansiero pa e próksimo 3 añanan. E business plan tambe ta deskribí e trayekto pa yega na un partner stratégiko, ku lo fortifiká e kompania ku kapital i konosementu (know how). Den e di kuater kuartal di 2017 lo kuminsá ku e selekshon di e partner stratégiko. Gobièrnu lo retirá na final di e trayekto aki.
Den kuadro di ehekushon di e akuerdo, Gobièrnu lo keda mantené e komishon di InselAir presidí dor di sr. Etienne Ys. E komishon na nòmber di Gobièrnu ta supervisá ehekushon di e akuerdo aki i ta konsehá Gobièrnu al respekto.
Partidonan tin pleno konfiansa ku e akuerdo aki a pone un base sólido pa garantisá e konekshonnan aéreo ku ta krusial pa Kòrsou, kaminda komunidat por konta atrobe ku un kompania di aviashon konfiabel i seif.
Informashon adishonal di e konstelashon di e miembronan nobo di hunta di komisario i tambe e tim di maneho:
Komisarionan