Otmar Oduber di POR ta bisa cu un malversacion enorme a tuma luga den un compania estatal, esta Setar. Tur hende por a sigui noticianan internacional caminda ta wordo mustra riba e hecho cu lo tin un caso di corupcion cu lo tabata tumando luga pa añanan den Setar y ta papia di un suma riba 15 miyon Dollar.
A haya e caso den corte cu a wordo entrega na Merca pa loke ta trata esunnan responsabel den e caso aki cu ta inclui no solamente trahado di Setar, pero tambe hendenan cu tabata traha na Banco Central di Aruba, hendenan den funcionnan clave. Lamentablemente si no tabata pasobra e noticianan aki a sali riba red internacional, esaki lo tabata un secreto nacional na Aruba.
Pueblo estafa y gobierno keto
E Minister responsabel den e caso aki pa Setar no a sali dilanti pa responsabilisa su mes na e pueblo pa e malversacion di casi 30 miyon florin te ainda. Pasobra ta trata e prijsnan y pagonan cu a tuma luga di henter e comunidad riba celularnan unda cu a “over charge” comunidad cu mas di 20% riba celularnan pa e ultimo aña. Pueblo a wordo estafa y no ta scucha nada di parti directiva di Setar cual ta bochornoso pa un compania estatal. Responsabilidad mester wordo carga pa esunnan cu ta responsabel pa e companianan aki.
Ta corda con bou di e mesun Ministerio aki, tabatin e asunto di ‘Hedging’ na WEB caminda cu mas di 300 miyon a wordo ranca for di e comunidad aki. Cual a costa pueblo entre 20 – 30% den reduccion di prijs di awa cu coriente na Aruba cu tabata pa un suma di 300 miyon Dollar cual tambe tur hende a laba man p’e.
Otmar Oduber ta spera cu e Minister encarga cu Setar ora e caso aki a sosode, cu ta e mesun encarga cu WEB por bin dilanti y duna un splicacion na pueblo riba e desfalco miyonario aki cu a tuma luga pa tanto tempo. E mester splica unda e director, unda e hunta di comisario y e mes como minister a keda unda un biaha mas pueblo di Aruba tabata e victima.