CARACAS, Venezuela- E portal di Banco Central di Venezuela (BCV) diamars a publica e aumento di e dollar y euro pa cu e bolivar.
Desde diamars Banco Central di Venezuela (BCV) a publica ariba su portal e cotisacion di e prijs di moneda internacional pa cu e Bolivar Soberano. E cambio di dollar segun e Sistema Subasta de Divisas (Dicom) tabata na 60 bolivar pa un dollar y 68,5 bolivar soberano pa un euro.
Te cu diabierna, 17 di augustus segun e tasa di Dicom, un dollar tabata costa 2.48 bolivar. Esaki ta nifica un aumento di casi 2500%.
Sistema monetario nobo
E publicacion di e cambio ta bin un dia despues di e entrada na vigor di e reconversion monetario, di cual a kita cinco cero for di e balor di e moneda y ta mara e bolivar na e petro, e criptodivisa Venezolano, cu lo tin un balor inicial di un bari di petroleo, di 60 dollar of 3600 bolivar soberano, segun e balor oficial di e moneda Mericano.
Presidente Nicolas Maduro a informa dialuna ultimo cu e maximo emisor Venezolano lo publica diamars e boletin oficial di e varios cambionan di bolivar soberano, e hecho di cu e ta hancra na e monedanan internacional y e “evolucion di e schema di reconversion economico”.
E schema cambiario ta unico, fluctuante y mara na e petro. Lo tin tres subasta semanal di divisa convertibel, cu e finalidad di logra e unificacion di e tipo di cambio segun e mercado.
E schema nobo a wordo precedi pa e abolucion di e ‘Ley di ilicitonan Cambiario’, dia 6 di augustus, cu un biaha mas ta duna e casnan cambiario pa haci operacion di operacion di compra y benta di divisa.
Diabierna ultimo e mandatario Venezolano a anuncia un salario minimo nobo di 1800 bolivar soberano, corespondiente na medio petro. Ademas, debi na e incremento di e ingreso mensual, gobierno lo asumi e diferencia di e nomina salarial den e proximo 90 dianan cu e meta pa minimisa e impacto di e medida nobo den e industria chikito y mediano di e pais.