Parlamentario Mervin Wyatt-Ras ta lamenta con e reunion publico a bay unda a trata medidanan dirigi riba nos pueblo. Fraccion di AVP a haci 235 pregunta mientras gobierno a contesta solamente 16 di e preguntanan. Esaki mientras cu parlamentarionan cu ta defende gobierno di MEP y POR no a haci pregunta. Durante e reunion Wyatt-Ras a ripiti varios di su preguntanan sinembargo gobierno un biaha mas a keda sin contesta un cantidad di nan. Tampoco gobierno no a otorga ningun rapport unda por mira cu a haci cierto investigacion di e impacto di e medidanan.
Ora Wyatt-Ras a insisti den primera tanda y segunda tanda, hasta ora di e ronda di vraagpunten pa haya contesta el a a ricibi remarcanan grosero specialmente di minister di finanza. Hasta a yama e parlamentario pa dom paso e ta insisti pa haya contesta y na final no a haya contesta riba varios pregunta.
Wyatt-Ras a haci preguntanan importante pa nos pueblo p.e. ki ta e consecuencianan social-economico pa diferente gruponan vulnerabel manera, esunnan cu ta cobra bijstand entre nan mamanan soltera cu yiunan, esunnan cu handicap cu ta cobra, nos grandinan y hobennan. Wyatt-Ras a puntra tambe con e subida di BBO, BAZV y BPPS lo afecta e poder di compra di nos hendenan? E efecto ariba inflacion? E efecto riba nos turismo y nos posicion di concurencia como pais turistico cu lo bira mas caro. Si prijsnan di comestibel lo subi, esaki lo haci cu prijsnan di restaurantnan tambe lo subi, prijs di transporte lo subi y tambe otro servicionan relata na turismo lo subi nan tarifanan. Wyatt-Ras a puntra con e lo afecta nos unico pilar economico manera nos turismo. Aki enbes cu e minister ta bisa cu e ta un punto cu mester bay investiga ta irita y ta contesta bruto hasta yama e parlamentario pa dom cu ta sigui puntra. Wyatt-Ras ta haya esaki ta muestra cu e minister en cuestion no sa su trabou y no sa tampoco como comunica drechi cu hende.
Ademas loke tabata notabel ta e desordo cu tabatin den parlamento. Un gritadera di parti di publico sin respeta parlamentarionan ni e Presidente di Parlamento. A resulta ora a puntra cu esunnan cu tabata grita y yama parlamentarionan pa nomber y hasta bully tabata campañadonan di minister Dangui Oduber cu awor hasta ta traha cun’e y ta cana cun’e ora e bishita instancianan respeta den nos comunidad. E bodyguardnan aki ta bin den Parlamento intimida diferente persona cu a bin wak reunion y ta grita parlamentarionan sin cu presidente ta stop nan y ora e pidi nan por favor pa stop nan ta bira contest’e. Un falta di respet di marca mayor. Kisas nan ta ser treci den parlamento pa purba silencia parlamentarionan pero esaki no lo logra. Wyatt-Ras ta haya cu si e gobierno aki berdaderamente kier mehora sector social y kier elimina tur tipo di abuso e mester cuminsa cu su mes. Mester ta transparente y entrega documentonan cu Parlamento pidi y e mester duna bon ehempel y no e mes bin cu su hendenan den nan ora di trabou bin grita parlamentarionan. Corda ta placa di nos pueblo e hendenan aki ta gana pa nan bin keda henter dia den publico pa grita y ofende hende. Wyatt-Ras ta haya tambe cu presidente di parlamento mester bira mas streng cu e tiponan aki pa asina mustra cu nan no por bin haci den parlamento mescos cu nan ta haci pafo. P’esey mes Aruba tabata di luto pa asina pasa medidanan cual ta un atraco ariba cartera di nos pueblo, sin investigacion, ni rapportnan, sin consulta gremionan y sin kier dialogo cu parlamentarionan. Gobierno na un forma dictatorial a manda e ley y den tres dia presidente di parlamento y e 12 parlamentarionan di coalicion a stempel e ley aki sin haci pregunta.