Despues cu panaderonan, cu ta representa 90% di tur loke ta produccion di pan na pais Aruba, a reuni cu gobierno, nan no a tende mas di gobierno.Ultimo minister di Economia, Sra. mr. Xiomara Ruiz- Maduro, a bisa e panaderonan cu e no tin tempo pa sinta cu nan na mesa. Asina tambe, a tuma e decision di aumenta e prijs di pan.
Durante e reunion nan a bin dilanti cu’n proposicion y kier a mira pa loke ta pan blanco y pan bruin den canasta basico y conoce prijs maximo.
Masnoticia a logra combersa cu Sr. Miguel Nucete, di Panaderia Moderna, cu a confirma na nos redaccion cu en berdad, prijs di pan lo conoce un aumento di 2% entrante 1 di juli. Segun Sr. Nucete, gobierno a bisa nan cu nan no tin tempo pa reuni cu nan, al menos no p’awo. Pero panaderonan for di un principio a bisa cu nan no por sigui asborba e BBO mas.
Den pasado caba na diferente biaha e asociacion di panaderonan a pidi pa bin cu un aumento pa pan, pero no a haya e atencion di gobiernonan anterior. Y e gobierno actual, tampoco a duna oido na e preocupacion di e panaderonan.
Asina tambe nan a subi prijs di pan cu 2%. Esaki ta e prome aumento den 7 aña. Di e aumento aki, 47 ct ta di gobierno. Panaderonan a bisa caba, cu nan no ta bay guli e prijs mas. Y cu e aumento di 6% entrante 1 di juli, 2018, e lo bira mas pisa pa nan!. Nan a haci tur lo posibel, pero e decision ta keda den man di gobierno.