Kico ta e pensamento di importadonan cu si ta paga belasting y botonan di Venezuela y Colombia, no. Sr. Hubert Dirks di Compra NV ta amplia ariba esaki.
Esaki a wordo papia, no solamente a base di ‘concurencia inhusto’. Sr. Dirks a sinta cu ex minister Schwengle, cu hefe di salubridad. Pero esaki ta un decision economico e no ta. E ta mas un decision politico. E importadonan por supply un miho producto. Si stop e barconan chikito bin, esaki por stimula te hasta e cunukeronan local. Un local no por bay planta tomati pa competi cu e prijsnan ey. E prijs ta exageradamente abao y gobierno no ta gana nada di dje. Nan no ta paga belasting, nan no ta crea cupo di trabao. Producto ta drenta sin control y niun hende no sa nada. En principio e ta estilo “Wild West”. Esaki mester stop.
Sr. Hubert Dirks di Compra NV a sigui bisa cu nan productonan cu ta wordo importa, nan productonan no mag di touc temperaturanan di 35 grado, no mas di 5 minuut. E productonan ta kisas un poco mas caro, pero cu ta sigura e consumido cu ta e ta haya un producto di calidad.
Un producto cu ta transmiti den cayente, ta daña mas lihe. Hopi hende no ta wak esey, nan ta wak e prijs. Mas barata, ta benta hopi mas lihe afo tambe. Na supermercadonan nan ta corta mita daña y hink’e den plastic. Arubianonan ta custuma di come cos bon na Aruba y esey no ta sosodiendo, door di esaki mes.
Sr. Dirks ta poco radical y tin ora hende no ta gusta ora di papia cosnan cla, pero si keda haci e mesun cos dia aden, dia afo, bo no por expect otro resultado. “Locura ta haci mesun cos constantemente y spera un otro resultado”. Aruba mester haci loke Maduro a haci. E ta zona duro, pero Aruba no tin niun beneficio y hopi riesgo. Paso si wak bon, cuanto cos ta drenta, cu no mester drenta Aruba. Cuanto gasto gobierno no lo tin pa mantene e waf ey. Laga e frontera sera y e importadonan lo abastece Aruba cu fruta y berdura. Productonan kisas lo ta 10% mas caro, cu ta 50 ct, 1 florin pa kilo. Pero lo benta menos afo y lo tin miho producto. Si bo come cos malo, bo tin consecuencia di esey.
Un producto bon ta wordo bon trata, esey ta sigura cu lo sosode, si e cos aki caba, es decir e situacion di barconan chikito. Nan a bati na porta caba di gobierno y a bisa pa no doblega. E importadonan lo abastece Aruba, segun Sr. Hubert Dirks di Compra NV.