Aki seis siman scolnan lo cuminsa bek y ainda no tin un solucion pa e asunto di schoolgeld. Sr. Marlon Sneek, di fraccion di AVP ta di opinion cu gobierno aki mester sigui e maneho di gobierno di AVP.
Ministerio di Asuntonan Social a haya 17 miyon florin extra ariba su presupuesto, y esaki ta cay bou di asuntonan social. Na momento cu’n mucha no por yega scol, cu e no por paga e 75 florin di schoolgeld, ya caba por wak kico lo pasa cu uniform y articulonan di scol. Lo pidi pa e minister pa asumi su responsablidad y asborba e gastonan aki. Cu menos fondo, a absorbe e problematica di no por paga schoolgeld. Y e aña aki tin mas fondo disponibel, dus no por tin un motibo pa no haci esaki.
AIRCOGELD
Pakico WEB of Elmar, cu tur aña ta hiba ganashi, dicon nan no ta inverti den scolnan pa bay den direccion di panelnan solar pa scolnan, pa e alumnonan haya airco gratis cu ta un necesidad y no un luho mas. Despues e resto di dia, mas o menos 5 ora despues di scol, Elmar ta keda haya coriente, ya cu e ta bay riba simbattery, cual ainda Elmar por abastece coriente. Sr. Sneek a bisa bou gabinete Mike Eman 2, nan a cuminsa cu e proyecto aki. Abraham de Veerschool no mester di coriente di Elmar, ya cu nan 100% riba panel solar. Scol di Kudawecha tambe ta ariba panel solar. Sr. Sneek ta spera cu e gobierno actual sigui cu e maneho aki. Pero asina cu e gobierno aki pidi 8 miyon for di cada compania estatal, pa e por paga debenan cu e ta traha, ya cu e gobierno aki tin 125 miyon mas na gastonan cu e ta crea, dimes cu e companianan no por contribui na e tipo di cosnan aki, ya cu ta proyectonan joint-venture cu a cuminsa caba. Ta trata di proyectonan piloto, e idea ta pa tur scol haya panelnan solar pa asina nan por haci uzo di coriente gratis. Y locual cu nan ta haya como den e caso aki, subsidio, nan ta keda cun’e tambe pa nan inverti den material di scol y pa actividad pa e muchanan. Ta spera cu pa aki dos pa tres aña no tin e discusion si tin cu paga aircogeld ya cu e ora nan lo tin solar panel riba nan dak y e por abastece nan mes cu coriente.
Den presupuesto, fraccion di AVP a mishi cu e tema aki ya cu nan a ripara cu e gobernacion aki no ta continuidad ya cu e ta purba kibra tur loke e gobierno anterior a haci. Ta papia di un gobierno cu a inaugura un Smart Community, cu ta un idea cu a nace di un Green Conference. Pero e gobierno cu a bin na mando, no solamente a para e actividad, pero a elimina esaki, a pesar cu nan a haya e documentanan digital. Kisas no ta tur cos nan ta di acuerdo cun’e, pero tambe tin cosnan bon cu tabata bon. Tambe e gobierno aki kier a caba cu e sociale vorming, aunke despues nan a bisa cu esaki ta sigui.
Mayoria di e proyectonan cu e gobierno anterior a laga cla atras, ta wordo destrui of ta cambia su concepto. Y esaki ta jammer, pero nan ta trece esaki dilanti ya cu pa AVP ta importante pa e scolnan, no solamente ta e hecho cu ta haya coriente gratis, pero e placa cu ta bay duna e scol na subsidio na energia, ta keda na e scol pa ubica esaki den locual nan ta haya cu ta importante pa nan scol, segun Sr. Marlon Sneek, di fraccion di AVP.