Gobierno kier sinta cu representantenan di Citgo pa nan duna cuenta di e desaroyonan di nan proyecto. Esaki Gobierno kier haci den luna di Augustus. Minister Presidente, Sra. Evelyn Wever- Croes cu e detayenan.
Minister Presidente, Sra. mr. Evelyn Wever-Croes, ta splica cu Gobierno no a ricibi ningun informacion tocante e suma pa por haci e financiamento di e proyecto. Na October e refineria mester ta cla cu parti substancial di e inversion. Pa loke ta trata e desaroyonan economico, Aruba a depende pa hopi aña riba dos pilar so, esta turismo y refineria. E futuro di refineria na Aruba no ta mustra mucho prometedor. Mester cuminsa pensa den e pilarnan mas chikito. Anteriormente a purba un otro pilar grandi cu tabata energia alternativa, den cual a inverti miyones, pero e no a produci locual a spera.
Recientemente, Minister di Asuntonan Economico a tene un cumbre economico cu stakeholders y gremionan. Hunto nan ta definiendo cua ta e areanan cu mester bay pone atencion riba dj’e. Por ehempel si dicidi cu agricultura por trece progreso pa Aruba, mester busca inversionistanan rib’e tereno aki pa yuda cu esaki. Tambe mester bay pensa con pa bira mas innovador y moderno. Actualmente nan ta bezig ta concentra rib’e cuater pa cinco areanan cu tin pa despues busca inversionistanan.