Dialuna Secretario di Estado Knops (Asuntonan di Reino) a entrega un propuesta di ley den Tweede Kamer pa por haci un intervencion administrativo na St. Eustatius. E propuesta aki lo regula cu e gobierno (eilandsraad) lo wordo disolve y e diputadonan como tambe e gezaghebber interino lo wordo releva di nan cargo. Lo nombra un hunta di comisiaria cu lo ta na cabes di e administracion gubernamental di St. Eustatius. E intervencion aki lo ta un reaccion riba e rapport ‘de commissie van wijzen’, cu a constata un negligencia grave na St. Eustatius. E negligencia ta bay a costa di civil y tambe e empresanan ariba e isla.
E situacion gubernamental na St. Eustatius pa un tempo caba ta un punto di preocupacion. Medidanan tuma anteriormente pa sanea e situacion no tabata tin e efecto desea. E ex minsiter di Binnenlandse Zaken y Asuntonan di Reino es tempo ey a institui un comision pa señala e problemanan y bin cu recomendacionnan. E comision forma door di Sr. F.J. Refunjol y Sr. J. Franssen, ta conclui cu e gobierno di St. Eustatius ta actua pafo di e margen legal.
E situacion administrativo actual ta wordo caracterisa pa anarkia y e mal gestion financiero, pero tambe pa discriminacion, intimidacion, menasa y insultonan, arbitrariedad y e buskeda di e poder personal a costa di e habitantenan di St. Eustatius. E comite ta conclui cu ta existi un descuido grave di e debernan y ta conseha e intervencion administrativo di gobierno.
E situacion administrativo tin consecuencianan di gran alcance pa e bida cotidiano di e poblacion di St. Eustatius. Ciudadano y empresarionan ta experimenta un desigualdad legal. Nada no ta na ordo ariba e isla y fisicamente e isla ta den un estado di descuido.
“Mirando cu otro medidanan no por a pone e gobierno realisa su foutnan, no ta keda nada otro: intervencion. E ta e medida mas pisa, pero ya cu tur otro a faya, esaki ta e unico opcion cu a resta. E pueblo di St. Eustatius merece miho”. Esaki segun Secretario di Estado, Knops. E lo ta biahando pa e isla pa asina informa e pueblo di esaki.
E comision ta critico tambe ariba e rol di gobierno Hulandes den e origen di e situacion actual. Parcialmente door di e situacion gubernamental ariba e isla y e consecuencianan di esaki pa e relacion entre Hulanda y St. Eustatius, tabata tin retraso den e ultimo añanan den proyectonan di innovacion di e careteranan, suministro di awa, vivienda, tuberianan subteraneo, procesamento di sushi, haf y aeropuerto. E retrasonan aki mester wordo corrigi. Siguiendo e conseho di e comision inversionnan lo wordo acelera, te na unda cu por ta posibel.
Den su conseho na gobierno ariba e propuesta Raad van State ta respalda e hecho cu na St. Eustatius tin un gran negligencia grave di e tareanan. Riba conseho di Raad van State a haci algun cambio ariba e propuesta y a aclarea e splicacionnan.
E asina yama ‘regeringscommisaris’ lo realisa tur e deber y poder di e gobierno di e isla. Esaki lo ta te ora cu e hunta di directiva di St.Eustatius por cumpli cu su debernan corectamente una bes mas. Solamente ora cu esaki ta e caso, lo bin eleccionnan pa un conseho insular nobo, pa asina e gobierno nobo por asumi e cargo.