Rockets Baseball Organization y Santa Cruz en general, ta contento debi cu nan tin e honor di ta e prome pa ricibi un ‘batting cage’ cu ta un vision di Prome Minister Mike Eman cu awe ta duna su fruta. Dialuna a inaugura e instalacion. Prome Minister Mike Eman a haci uzo di e ‘pitch machine’ pa lanza e baseball y Minister di Deporte Alex Schwengle como bateado.
Na mas cu un ocasion Prome Minister Mike Eman y su team cu ta traha den bario a bishita Rockets y a yuda cu limpiesa, tribuna y mini clubhouse. Tur esaki ta wordo haci den cooperacion di varios entidad, sea priva como publico. Awo e ayudo a yega mas leu despues cu a logra, un donacion di Nirint Shipping B.V., pa haci entrega di un batting cage super moderno cu a bin cu su turf, cortesia di Ministerio di Deporte y Lotto pa Deporte. E batting cage ta bin tambe cu un ‘pitching machine’ hopi sofistica. E pitching machine, Prome Minister Eman a splica, por wordo poni na diferente nivel y velocidad. “Nos ta contento cu awe, den compania di dirigente, hungado y boluntarionan di Rockets por inaugura e batting cage cu ta testimonio di Gobierno su aprecio pa e trabou cu Rockets a bin ta haciendo pa prepara nos deportistanan,”Prome Minister Eman a bisa cu un voz yena di orguyo.
Varios persona y grupo a traha pa logra haya batting cage pa e organisacionnan cu ta practica baseball, manera Rockets. A wordo informa cu tin 6 di e batting cagenan aki yegando Aruba, di cual uno mas lo bay pa Rockets mirando e cantidad grandi di hobennan (mas di 100) cu ta forma parti di e organisacion aki. “Intencion ta pa instala e tipo di mashinnan aki na tur canchanan deportivo di Aruba. Den e prome fase nos ta papia di sigur un 12 batting cage,”Prome Minister Eman a bisa e atardi aki.
Presidente di Rockets, sr. Cederick de Cuba, a expresa gradecimento na Prome Minister Eman, Minister Alex Schwengle, team di e Ministerionan y tur otro persona cu a duna un man pa realisa e “bunita proyecto aki.” Rockets tabatin un aparato asina pero el a kibra. E ta invita otro organisacionnan pa haci uzo di e mashin y na mesun momento ta haci un apelacion pa cuida esaki hopi bon. “Nos a tende cu nos lo bay haya un batting cage, pero nos no a spera di haye asina rapido y tampoco cu e lo ta asina sofistica. Awor nos ta spera di haya luz pa e adultonan tambe por train anochi.”
Ministerio di Asuntonan General tin un team encabesa pa Ditto Acosta cu den forma regular ta bishita, riba peticion di e mandatario, organisacionnan deportivo pa mira ki ayudo nan mester pa sigui cu e trabou pa laga e muchanan practica deporte y hiba un bida sano.