Miembro di Tweede Kamer, Sr. Andre Bosman a manda un carta pa Minister di Relacionnan Exterior y di Asuntonan di Reino, Sr. Ronald Plasterk, haciendo un serie di pregunta tocante un speech di Prome Minister Mike Eman durante un encuentro cu un grupo di sostenedor Latino.
E mandatario en cuestion lo a priminti e comunidad cu lo acelera e proceso pa haya passpoort Hulandes. E preguntanan di Sr. Bosman tabata pa haya mas claridad ariba esaki y tabata kier un contesta pa dia 20 di September, pa 5 or, ora di Hulanda.
Minister Plasterk na su turno a contesta Sr. Bosman y a bisa cu e sistema actual ta frustra cualkier intento pa duna paspoort Hulandes “como regalo”. Esaki tabata un di e promesanan cu Sr. Eman lo a haci durante e encuentro aki, cu e comunidad Latino, caminda cu minister Benny Sevinger tambe tabata presente.
Den e carta, contestando e preguntanan, Sr. Plasterk a aclaria cu e proceso di haya nacionalidad Hulandes y paspoort Hulandes. “Un nacionalidad y un paspoort ta dos diferente asunto”, segun Plasterk. Un nacionalidad ta un relacion huridico entre un persona y un estado soberano, y a base di e nacionalidad ey, un persona por bin na remarke pa un pasaporte. “E Ley di Reino riba e ciudadania Hulandes, cu ta valido na Aruba tambe y cu ta regula e otorgamento di un nacionalidad Hulandes, ta stipula diferente condicionnan cumulativo pa haya nacionalidad”. Entre e condicionnan ta poni cu un persona mester biba 5 aña consecutivo legal na Aruba y tin Aruba como base, prome cu por haci peticion pa naturalizacion. Mientras cu pa stranheronan sin estado, ta conta cu e persona mester ta na Aruba pa tres aña legalmente consecutivo. Pa pareha di un Hulandes, ta conta entre otro, e condicion cu e matrimonio ta existi por lo menos 3 aña.
Fuente: https://www.rijksoverheid.nl/