Ora Mike Eman, den otro momento di locura, a sclama di ta orguyoso di a hinca Aruba den e debe catastrofal, hopi ta esunnan cu a para den rij pa denuncia e forma con e kier a hustifica su mal maneho. E unico excepcion tabata Otmar Oduber cu a declara e tempo ey di ta mas orguyoso cu nunca di ta AVP. Parce sinembargo cu e gobierno actual tin e tendencia di sigui e forma di proceder aki, esta sigui derocha placa.
Minister Xiomara Ruiz-Maduro a tene un conferencia di prensa den pura, despues cu e asociacion di bankero (ABA) a anuncia di lo bay cobra desde 1 di juli 2018 e “crisisheffing” di 6% riba tur nan transaccionnan bancario. Minister no a desmenti e ponencia di e bankeronan, pero a señala di a spera un actitud mas bien di convivencia cu e pueblo. E minister a comete un “rookie mistake” y lo el a luci si e lo a disculpa su mes pa esaki enbes di bay den un atake frontal.
Tur e discusionnan aki ta desvia nos for di e reto mas importante cu nos isla ta confrontando awor aki y esey ta reduci e gastonan of sikiera evita haci gastonan innecesario. A introduci e “crisisheffing”, pero parce cu no tur minister ta para riba e mesun liña, pasobra nos por constata cu ainda tin cierto minister cu kier sigui malgasta placa. Ya caba CAft a indica cu e
gastonan di personal ta mas halto den e prome kwartaal di 2018, sicompara esaki cu aña 2017. Cu otro palabra nombracionnan politico ta sigui tuma luga y no manera cu kier aparenta cu ta tumando hendenan den servicio pa frenta nos problemanan social. Kico e tantisimo
nombracionnan cu p.e. ta tumando luga na Serlimar tin di haber cu nos
problemanan social?
Ta firma cu EcoGas pa deposita e desperdicio di cas cu Serlimar ta recoge den e facilidad di EcoGas na Barcadera. Kico esaki ta encera “mag Joost weten”, pasobra di un banda e directora di
Serlimar ta bisa cu lo bay produci gas y den e mesun rosea ta bisa di no sa mes cuanto esaki lo bay costa. Ta obvio cu e gasto cu e maniobra aki lo bay costa no ta su problema, pasobra ta nos pueblo lo mester bay paga toch. Di otro banda e director di Ecogas ta bisa cu lo bay separa e
desperdicio y lo bay empaqueta esaki. Nada di produci gas. Awor “who is fooling who”??
Ta bisto cu esaki ta un decision ad-hoc sin cu prome a presenta na parlamento un plan integral pa maneho di desperdicio, particularmente si tene na cuenta cu ningun hende sa cuanto esaki lo bay costa, pero ta core cera un convenio si.
Mas remarcabel ta e declaracion “doodleuk” di e minister cu mester haci tipo di inversionnan aki pa promove crecemento economico! Ma no ta esaki Mike Eman tabata grita, “Niet snoeien, maar groeien”!! Algun tempo pasa nos tabata tende e “sprookje Green” di Mike Eman di
AVP/POR y awor nos ta tende e “sprookje” di “Waste to Energy” di MEPORED. “Sprookjes” cu al final ta nos pueblo a y lo mester bay ser hiba pa e altar di sacrificio.
Pa purba di hustifica e maneho di derochamento di placa, ta bisa cu mester bay huur e edificio di e “sponsor” di POR pa asina ey duna miho servicio y alabes pa por pone un dump na Pos Chikito pa por “recycle”. Pues den un area residencial lo bay deposita desperdicio. Pero e pueblo di Pos Chikito no mag di keha, pasobra lo bay conoce un crecemento economico. Alabes tin “leasemento” innecesario di trucknan cu lo bay costa mas o menos 250.000 florin pa luna cu pueblo lo mester bay paga p’e tambe. Esaki tambe lo percura pa un crecemento economico??
No tin bahamento di gasto, al contrario ta fomenta derochamento di placa y lamentable ta cu un biaha mas parlamento ta haña su mes confronta cu un “fait accompli”.E fiesta ta continua cu e mudamento di Arubahuis sin cutin cifranan concreto cuanto e fechoria aki lo bay costa. Aparte di e dealnan straño aki, nos ta ripara cu tin un biahamento cu delegacionnan grandi pa kico cu ta, siendo cu Aruba supuestamente ta den crisis. Un biahe cu a hala nos atencion ta e biahe cu dos minister pa Europa a haci pa bay bishita e “booth” di Señor Colindres, e mesun persona cu
Rudy Lampe a investiga den e casonan di “luchtbrieven”.
Y p’esey mester constata cu ta parce cu e expresion di Mike Eman di ta orguyoso di a hinca nos den debe lo mester a haya oido cerca e gobernantenan actual, pasobra atrobe “the sky is the limit” den gastamento di placa mientras ta exigi pa tur otro gremionan y pueblo
contribui na soluciona e debe.
Duele ta cu (mal)gastamento di placa aki y e fiestamento sin fin ta na ordo di dia, mientras e di prijsnan lo subi y ata nos pueblo ta haya un otro medida den su strot hinca cu e no tabata spera. Un biaha mas tin fiesta, e biaha aki cu otro bailado y otro banda musical, pero cu e pueblo no ta wordo invita pero si mester bay paga pa e fechorinan aki. ARUBA,QUO VADIS??!!