Parlamentario di MEP, Glenbert Croes ta di lamenta cu keto bay e tema di Citgo y PDVSA a cuminsa cu mal pia pa loke ta maltrato di trahadornan local. Glenbert Croes a haci publicamente un denuncia riba esaki.
E parlamentario a sigui splica cu nan ta balora e hecho cu PDVSA/Citgo y Citgo Aruba, ta socio estrategico di nos pais. Den e brasa ehecutor di e aliansa estrategico ey entre Aruba y Venezuela, den cooperacion petrolero ey, tin Refineria di Aruba NV cu ta hunga un papel sumamente importante.
Croes di su banda no lo bay keda keto riba e hecho cu e ta desea pa Refineria di Aruba NV y Citgo y PDVSA ta atento riba preocupacionnan cu ta wordo treci na su persona. Na e momentonan aki, e tin denuncia di maltrato di trahadonan local y contratistanan local. Croes kier a pasa e companianan cu a wordo denuncia na Refineria di Aruba NV y tambe na Citgo PDVSA, cu e apelacion franco, e apelacion sincero, pa nan tuma carta den e asunto riba e denuncianan aki y Croes lo haci’e cu tur compania cu yega na nan conocemento. Na e momentonan aki, companianan Pimec, companianan Hafran, companianan PDV Mantenimiento y companianan PDV Casa, a yega denuncia cerca nan riba maltrato na trahadonan local y contratistanan local, ta pidi respetuosamente, encarecidamente, pero firmemente na Refineria di Aruba NV y na e socio estrategico di nos pais, cual ta PDVSA, Citgo y Citgo Aruba, pa tuma carta den e asunto. Ta yegando na un momento crucial cu ta desea pa e inversionnan cuminsa ya caba. Tin di compronde cu e oficialisacion di e pakete di incentivonan ta kedando cla pa e inversionnan tuma luga. Tin informacion cu tin cambionan ainda cu lo bay tuma luga, cu speransa cu tur e preocupacionnan cu ta trece padilanti, lo wordo teni na cuenta, segun Croes.
Pesey mes Croes a habri su declaracion. E kier reconoce Citgo Aruba, Citgo y PDVSA como un socio estrategico di vital imporancia pa futuro di nos pais, den e espirito di reconoce esey, nan compronde tambe cu nan tin un responsabilidad hunto y en particular, Refineria di Aruba NV, pa bay sigura pa trahadonan local y contratistanan local, haya un oportunidad berdadero pa traha den e refineria, pero sigur tambe, pa nan no wordo maltrata.
Discusion cu e lo bin den futuro cun’e, ta e hecho cu e ta bezig ta wordo informa tambe riba e pago pa ora cu ta wordo ofreci na nos trahadonan.
Croes a splica cu na Aruba tin un industria cu pa 100 aña a desaroya den un di e industrianan di mas importante pa Aruba. Pero tambe e trahadonan cu a forma nan mes y traha nan mes, a crea nan carera den e refineria, contratistanan tambe, a desaroya un experticio. Durante e ultimo añanan cu Coastal a opera e refineria, despues El Paso a opera e refineria, despues Valero a opera e refineria, a crea un balor di mercado na salario, pero e pago pa e trabaonan na e contratistanan local, ta wordo paga, por lo cual awor aki, ora cu ta Citgo ta bay opera nos refineria, inverti den nos refineria, e no por ta asina cu un dado momento Citgo ta bay paga nos contratistanan local y nos trahadonan local malo.
Unda cu nan mester bay protesta of entrega denuncia, nan mester bay entrega denuncia entre otro na departamento di labor. E departamento di labor y e minister, kende awe no tey mas, tabata un di esnan cu mas ta coopera cu Citgo y contratistanan di afo, pa no duna nos yiunan di tera un fair chance. Por lo cual e trahado local na Aruba, ta sinti su mes sin poder (machteloos), sin potencia, pa haci nan denuncia, pasobra nan ta sinti cu si Gobierno mes ta laga trahadonan local cay, contratistanan local cay, con nan por para contra Gobierno, si dado momento nan ta para frente e Gobierno. Nan ta para frente Citgo. Ningun hende ta tuma parti pa e trahado local. Pesey Croes a asumi e responsabilidad, den nomber di MEP, pa defende como un sindicalista. Partido MEP, ta un partido sindicato. Nan ta sinti nan mes yama pa defende e trahadonan aki. Pesey mes Croes ta haci’e na un bon manera. Prome ta pidi e atencion di Refineria di Aruba NV, cual ta e brasa di Gobierno cu mester supervisa, controla, defini e cooperacion cu Citgo Aruba. Pero tambe ta haci e apelacion na Citgo Aruba como socio estrategico, pa tuma conciencia di e asunto, cu no por permiti pa nos trahadonan wordo trapa.
Tin un problema grandi, e trahadonan local y contratistanan local no ta haya trato husto. Riba dje ta laga nan wordo maltrata. Obviamente, como representante di pueblo, no por permiti, segun Glenbert Croes.
E ta sigui splica cu e ta parlamentario pa e termino di 2013/2017 te cu 22 di October. Te na e ultimo dia, lo e haci su trabao cu ta campaña of no, e hecho cu e ta politico, semper e lo wordo acusa cu e ta haci politica. Si ta politica e ta haci di campaña of no. Croes a splica cu e lo haci politica y campaña cuater aña aden y cuater aña afo, tanten cu e ta defende interes di pueblo y di e pueblo trahado, y tambe e interes di e contratista local.