Tin un guera mediatico na nivel internacional, contra Gobierno di Venezuela, Contra Venezuela, Contra Citgo. Con e structura di financiamento di Citgo ta, con el a wordo hipoteca, parlamentario Glenbert Croes no sa di dje. Su prome impresion ta no kere den loke ta sali den prensa liber amenos cu Citgo na momento cu e bay den un proceso di financiamento asina importante, si ta berdad cu e lo mester hipoteca su accionnan, e lo mester saca un comunicado den e sistema den e pais cu e ta opera, cual ta Merca, como empresa, kico bo ta haciendo. Citgo Aruba ta otro cos, segun Croes.
Citgo Aruba ta den un proceso unda cu e lo prefera nan mes anuncia.
Croes tabata na Venezuela pa su salud, pero no a sinta na man cruza. Tin hopi decision a tuma luga na e momentonan aki na nivel di Gobierno di Venezuela pa cambionan cu ta bay bin y ta prefera nan mes anunci’e.
Su speransa ta cu Gobierno di Venezuela tende e gritonan na Aruba unda cu ta pidiendo pa Citgo y PDVSA tene cuenta cu e clamor di nos pueblo pa nos yiunan di tera trahadonan local, contratistanan local, haya e oportunidad husto y berdadero pa drenta e refineria. Pa elimina e privilegio cu ta wordo duna na un partido politico di Gobierno, un compania cu ta liga of un paar di compania cu ta liga na ministernan, pa elimina e sistema di privilegio ey, pasobra MEP no lo acepte ni tolere. Manera cu a lucha pa salba e refineria, mescos nan lo lucha pa e trahado y contratistanan local pa haya e oportunidad den e refineria.
Ta spera cu e Gobierno di Venezuela tende e clamor di e pueblo Arubiano manera cu el a tende e clamor pa habri e refineria, pa Gobierno di Venezuela pone Citgo y PDVSA compronde cu e lucha ey na defensa di e trahadonan local, no lo bay ria riba dje. Januari lo bay ta un luna decisivo, segun e parlamentario.
E speransa grandi ta, cu loke tin di compronde cu e decisionnan ta wordo tuma pa un consorcio cu lo financia y construi e refineria ta den nan relacion cu Citgo, cu e speransa ta cu un consorcio internacional asina tambe tende e clamor di e pueblo aki pa duna nos yiunan di tera, nos trahadonan local, nos contratistanan local un oportunidad husto pa impedi e sistema di privilegio cu tin awor aki cu te awor aki Citgo y PDVSA no a tende e gritonan. Mescos cu Croes ta sostene e reapertura di e refineria, ta sostene PDVSA, ta sostene Citgo, MEP ta prome yama como esnan cu a lucha duro pa habri e refineria, pa pone PDVSA y Citgo na nan luga ora cu ta kere cu nan ta faya. Croes ta keda optimista cu Gobierno di Venezuela tende clamor di pueblo y tambe di e consorcio cu lo bay construi e refineria lo tende e clamor di e pueblo aki cu finalmente Citgo y PDVSA lo draai bij pa compronde cu na Aruba nos no ta bay acepta un sistema di privilegia partido y Gobierno, privilegia companianan di ministernan cu ta hinca den e compania. Tur hende mester tin oportunidad pa haya un trabao.