Cu Citgo gusta of lag’i gusta, cu Gabinete Mike Eman gusta of lag’i gusta, nos digno pueblo bao liderasgo di MEP lo no descansa te ora tur trahado local y contratistanan local drenta traha den e refineria di Aruba.
Citgo mester tuma un decision, nan kier ta pará na banda di nos digno pueblo cu lucha den accion ora cero contra Valero y gabinete Mike Eman 2 cual accion di nos pueblo ta loke a haci posibel pa nan tuma over e operacionnan di e refineria. Of Citgo ta tuma parti pa e Gobierno enemigo y castigador di su propio pueblo cu kier a desmantela e refineria cu ta gabinete Mike Eman.
Te awor cu su actonan Citgo a demostra di a tuma parti pa gabinete Mike Eman y partido AVP, participando alabes den e proyecto partidista di laga te awor solamente e trahadornan cu ta cu AVP y e ministronan di AVP drenta y traha den e refineria, laga solamente e contratistanan cu ta cu e ministronan di AVP y AVPdrenta traha den e refineria.
E hecho aki ta haci cu nos di MEP ta bayendo den rumbo di un confrontacion frontal y total cu Citgo y gabinete Mike Eman, y nos ta asumi e responabilidad pa e consecuencianan. Den bon of den malo Citgo y Gobierno di AVP lo compronde cu nos di MEP lo no permiti hamas pa nuin Gobierno, niun compania trapa riba e derecho y speransanan di henter nos digno pueblo pa mira su yiunan di tera haya trabao den e refineria. Nos di MEP lo no permiti hamas niun gobierno niun empresa trapa riba e oportunidad y speransanan di nos contratistanan local pa nan por haya trabao den e refineria.
MEP ta dicido pa den bon of den malo, cu e accion ora cero 2 laga tur hende compronde cu nos no ta acepta traicion y engaño di niun hende contra nos digno pueblo.
Citgo y gobierno corigi lo tin paz, pero sino boso lo compronde e idioma di e forsa popular di nos digno pueblo cu den e accion ora cero a pone Valero y AVP baha cabes y compronde cu nos pueblo ta protege y defende su patrimonio. Nos trahadornan Arubiano y nos contratistanan local ta patrimonio di nos pueblo y nos lo bolbe defende e patrimonio aki.