Fundacion Respeta Mi y Consultorio pa Asuntonan di Adiccion (CAA) a logra organisa exitosamente den luna di mei 2018 un encuentro pa mamanan hoben entre 15 pa 20 aña di edad.
E encuentro a tuma luga na Fundacion Respeta Mi cu dos (2) sesion riba diferente fecha, na unda cuater (4) mamanan a participa boluntariamente. E prome sesion tabata na encargo di Yanelis Jimenez, Preventiemedewerker na Fundacion Respeta Mi, e di dos sesion a wordo duna door di Emmeline Webb, Trahado Social na CAA y Miosotis Tromp, stagiaire Trahado Social na CAA.
E meta di e encuentro aki tabata pa e hobennan comparti nan opinion y experiencia tocante nan situacion, ricibi informacion con pa preveni abuso di mucha y compronde cu pa medio di adiccion abuso di mucha ta sosode. Nan a ser ekipa cu informacion valioso di prevencion di abuso di mucha y a haya nan pakete di booklets na Papiamento di Fundacion Respeta Mi. Tambe e hobennan a ricibi un presentacion di FADA tocante e uzo di droga y naturalmente a ser dirigi pa sigui cu guia cu otro instancia como Fundacion Pa Nos Muchanan y Tienda di Educacion.
A resalta cu algun di e mamanan tabata tin e pensamento cu suta un mucha ta algo normal, mirando cu nan mes a wordo lanta asina. Esaki ta un pensamento eroneo cu ainda ta biba den nos comunidad y nos ta luchando pa cambia esaki. Nos comunidad mester compronde cu klap of suta un mucha ta un forma di abuso fisico di mucha. Sutamento tin su consecuencia negativo den e desaroyo social emocional di un mucha y por tin su efecto negativo a largo plaso.
Mester tene cuenta cu unabes cu bo suta un mucha esaki ta trece mas violencia. Pues e mucha ta siña cu e unico manera pa resolve conflicto ta door di violencia. Asina aki e circulo vicioso ta keda ripiti di generacion pa generacion.
Un otro aspecto cu a resalta ta cu tur mamanan tabata victima den pasado di algun tipo di abuso of diferente abuso. A bin dilanti un combinacion di abuso fisico, abuso emocional, mucha como testigo di violencia domestico y negligencia. Tabata hopi bunita pa observa con e participantenan tabata sostene otro. Alabes tabata hopi positivo pa scucha cu nan no kier ripiti e patronchi negativo cu nan propio yiu y kier sigui educa nan mes pa siña e miho forma pa lanta yiu. Nan a keda masha gradicido cu ambos instancia Fundacion Respeta Mi y CAA cu a organisa e encuentro aki, mirando cu nan a siña mas tocante e topico di abuso di mucha y adiccion.
Na final di e sesionnan e mamanan a ricibi un certificado di participacion di parti di ambos instancia Fundacion Respeta Mi y CAA. E intencion ta pa den futuro sigui educa y asina tambe tatanan hoben por wordo beneficia y tambe por tin e libertad pa comparti y ricibi e mesun informacion.
Nos kier a gradici tur e mamanan hoben cu a asisti na e encuentro y na tur esnan cu di un manera of otro a yuda.
Si mester mas informacion, tuma contacto cu Fundacion Respeta Mi na 582-4433 of pasa cerca nos na Dominicanessenstraat #12.