Sra. Zoraida Conijn di New Life for Paws ta splica di un cacho cu yama Luna, di casi dos aña. Doño di e fundacion ta Natalia Hiermans, y e ta un persona basta conoci den comunidad. Nan ta rescata cualkier bestia di caya, hibanan veterinario, busca foster pa nan, pero pa puppynan ta busca un hogar pa nan na Merca. E fundacion cu a rescata e puppynan, ta di opinion cu e puppynan a wordo rescata for di cayanan di Aruba y nan kier pa nan por haya un otro ambiente, pa nan no cay bek den e mesun situacion. Pa loke ta e cachonan grandi, si nan logra haya un hogar pa nan na Merca, ta manda nan tambe. Pero si no, ta busca un hogar pa nan aki na Aruba mes.
Tabata tin un caso di un cacho Luna, cu te ainda no ta conoci di cual raza e ta. Sra. Conijn ta splica cu ela haya un yamada di un Sra. Geraldine Kock, cu ta un di nan boluntarionan tocante di un cacho na Noord Cura Cabay cu ta wordo maltrata y polis a tuma contacto cu e fundacion pa asina si por yuda pa cu e situacion aki. Luna ta un cacho cu a pasa den tanto cos, e no tabata haya cuminda, e no tabata haya awa, e tabata malo y ni asina e pober cacho tabata haya su medicinanan. E pober cacho ta un cacho cu nunca nada a wordo haci p’e. Ta trata aki di maltrato animal den tur sentido di palabra.