Fundacion Movimiento Ta Bida pa di 7 biaha ta organisa canamento special pa adulto mayor.
Esaki lo tuma luga diasabra dia 17 di September proximo pa 7’or di mainta na Linear Park.
E start y e final lo ta na banda di Plaza Turismo, na unda tambe por inscribi, esaki lo cuminsa pa 6.30’or di mainta.
Por inscribi pa e canamento di 2 km of pa esun di 5.5 km.
Tur 2 canamento lo cuminza pa 7’or bay direccion pa Brandweer.
E participantenan di 2 km lo termina na Plaza Turismo y esnan cu ta participa pa 5.5 km lo sigui bay direccion pa Wilhelmina Park, sigui patras di casino y lo termina na Plaza Turismo.
E canamento di 2 km lo ta un ‘fun walk’ y esun di 5.5 km lo tin premiacion den categoria den ambos sexo di edad di: 60 – 64 aña, 65 – 69 aña, 70 – 74 aña, 75+ y premionan special pa esnan di 80+.
E aña aki a decidi pa dedica e canamento na honor di Sr. Mario Maduro, un persona cu ta un ehempel den embehecimento activo y tambe semper dispuesto pa yuda otro cu su experiencia y conocemento den canamento.
Directiva di Fundacion Movemiento Ta Bida ta gradici Subsidie Commissie pa e aporte pa asina nos por a continua cu e Weganan Nacional 60+.