Fundacion Lotto pa Deporte sosteniendo deporte di arte marcial

0

Dojo Boye Martial Arts Center a reuni cu Fundacion Lotto pa Deporte unda cu a recorda con e aña anterior a bay. Ronny Boye, instructor di e dojo, a expresa su gratitud pe yudansa cu nan a ricibi. Dojo Boye Martial Arts Center a entrega Fundacion Lotto pa Deporte e invitacion di e atleta Bruniel Kruythoff, kende a representa Aruba den e Panamerican Muay Confederation aña pasa na Colombia y a clasifica p’e competencia mundial di Muay Thai 2018 na Thailand. Fundacion Lotto pa Deporte a keda contento cu e logro aki di e atleta kende a destaca den e deporte di arte marcial.

Ronny Maduro tabata contento cu su encuentro cu Fundacion Lotto pa Deporte, unda cu el a expresa su gratitud na e director di FLpD p’e yudansa cu nan a ricibi. “Di Stefano Wernet tabata un alumno di mi. E sa cu sport ta hopi importante y no yega pone un hende”, asina el a expresa. E reunion cu FLpD tabata importante p’e instructor pa motibo cu e persona tabata un atleta y sa kico ta un atleta. E encuentro entre FLpD y Dojo Boye Martial Arts Center a bay den un ambiente ameno, unda cu mr. Di-Stefano Wernet RA, director di FLpD a scucha riba e logronan di aña pasa na Colombia y cu e aña aki na Maart nan lo ta competiendo den e competencia mundial.

Durante e encuentro aki a splica riba e parti cu Lotto ta genera e placa pa asina deporte sigui na Aruba, di cual hopi hende ta mira esaki diferente. “Lotto ta mira e seriedad di un organisacion y seriedad di un atleta. Nan mester mira kico bo ta haciendo pa bo yega unda bo mester yega”, asina el a elabora. Aña pasa FLpD a mira e seriedad di Dojo Boye Martial Arts Center, pasobra nan a clasifica na Surinam cu 2 atleta y despues mester a bay Colombia. E dojo a acerca FLpD y asina nan a haya e yudansa pa competi na Colombia, unda cu nan a logra 1 medaya di oro y 1 di plata y a clasifica pa representa Aruba den e mundial na Thailand den luna di Maart. E atletanan den Muay Thai Kickboxing ta riba un bon nivel, pasobra Rusia y otro paisnan grandi di Europa no a logra clasifica p’e campeonato aki, asina Ronny Boye a expresa. Nan lo mester ta presente na Thailand dia 7 di Maart, unda cu tin un clinica. Aki e atleta lo tin cu haci test, pa asina e por competi.

Aña pasa Fundacion Lotto pa Deporte a yuda Dojo Boye Martial Arts Center pa participa den e torneo di clasificatorio na Bogota. Lotto un biaha mas ta yuda nan, pasobra nan t’ey pa yuda deporte pero principalmente e hubentud. Un deporte, sea e ta karate, muay thai of taekwondo, ta duna hende disciplina, perseverancia y respet. Lotto ta agradecido na e cumpradonan, pasobra mas loteria bendi por yuda mas deporte. Aña pasa tabatin hopi evenemento y Lotto tin plannan grandi p’e comunidad deportivo.

Comments

comments