Fundacion Lotto pa Deporte a haci entrega di uniform nobo na Tiger Taekwondo Academy. E uniformnan aki ta pa ora e scol di taekwondo representa Aruba tanto na eventonan local como internacional, unda e taekwondistanan lo haci uzo di esaki.
Den ultimo tempo Lotto ta sponsor diferente deporte. Representante di Fundacion Lotto pa Deporte, Elias Kock, a elabora cu Tiger Taekwondo a acerca nan pa yuda cu uniform nobo y pa esaki Lotto ta contento di a sostene e scol. Meta di Lotto pa Deporte ta pa yuda, mientras cu e loteria ta bon bendi y tin ganadonan cu ta cambiando nan bida pa asina mas scol di taekwondo por haya mas aporte di e fundacion.
Master Theo Rodriguez di Tiger Taekwondo Academy a expresa cu pa nan ta un orguyo di tin e uniform nobo aki. Semper nan ta biaha como scol. Ora biaha como atleta selecciona di Aruba Taekwondo Bond, nan tin nan mesun uniform of si ta biaha como atleta selecciona di Comite Olimpico Aruba, nan tambe tin nan mesun uniform.
Den e caso aki nan a haci un esfuerso pa asina e scol por tin nan mesun uniform. E scol a acerca e fundacion, cual a yuda nan pa haya esaki. “Nos ta contento cu loke nos a haya ya cu nos tin nos mesun uniform p’e muchanan por representa Aruba, pero tambe nan por representa Lotto pa Deporte den cada evento cu nan sali como Tiger Taekwondo Academy”, asina el a expresa. Fundacion Lotto pa Deporte a desea e scol hopi exito.