Sra. Lisette Gomes, di Fundacion Lisette Gomes contra abuso di mucha, a declara cu e biaha aki specificamente e protesta ta bay ta na Ministerio Publico. E ta bay dirigi na e fiscalnan cu ta pidi e castigonan asina abao. Ta asina cu e investigacion ta cuminsa na KZP y ta sigui na Ministerio Publico, ya un caso casi full cera caba.
Pero ta haya abusonan, delitonan cu ta asina delicado pa bay over di dje, pa papia di un rapport medico cu ta duna indicacionnan hopi fuerte di abuso pisa sexual cu a pasa cu mucha. Y toch ta haya fiscalnan cu ta pidi castigonan asina abao.
Los di esey no tin un ayudo psicologico tampoco pa e persona cu ta comete e crimen aki. Den un castigo di un aña, pero e no ta sinta ni esey, ya cu ta kita e tempo preventivo cu el a sinta caba y tambe pa buena conducta ta kita un tercera parti di e castigo, y e ora e persona ta sinta un castigo di algun luna solamente. Esaki contrario na e victima, cu hopi biaha no ta haya e ayudo psicologico y ta keda cu trauma pa resto di su bida.
Sra. Gomes, di Fundacion Lisette Gomes contra abuso sexual di mucha, ta na altura cu Cuerpo Policial hopi biaha no tin e materialnan ni ekipo ni e profesionalnan pa investiga un caso mas profundo y e Fundacion a sinta cu Minister Dowers aña pasa y a trece e puntonan dilanti, specificamente na dje. Di kico ta locual falta pa cera e investigacionnan aki manera cu nan mester ta. Y Sra. Gomes ta haya cu ta jammer pa bisa cu nan no a keda mucho satisfecho cu e reunion aki, ya cu no ta duna e atencion debido na e problematica aki. Na otro palabra e minister no a acepta cu en realidad tin un problema di Manpower e.o. na KZP y segun Minister tur cos ta trahando manera mester ta.
Segun e fundacion tin entendi cu lo aloca fondonan pa e departamentonan aki, pero atrobe mayornan ta acerca e fundacion pasobra cu nan ta entrega keho, pero e casonan ta dura, mescos cu no tin material ni nada. Dus no ta mira niun cambio den esaki. Asina Sra. Lisette Gomes di Fundacion Lisette Gomes a finalisa bisando.