Orange Aruba ta un iniciativa di Fundacion Hende Muhe den Dificultad durante un periodo di 16 dia consecutivo cu e meta di conscientisa comunidad riba e tema di eliminacion di violencia contra hende muhe. Apertura di e actividad aki a tuma luga y Suzy Kock, Presidente di Fundacion Hende Muhe den Dificultad a bisa cu e idea pa bin cu e evento aki a nace aña pasa despues di un bishita na Hulanda pa un conferencia di hende muhe.
United Nations a cuminsa cu un campaña contra violencia di hende muhe y e campaña aki na 2015 tabata encera un peticion na e paisnan pa nan ilumina edificionan of monumentonan na oraño pa asina mustra nan solidaridad pa cu eliminacion di violencia contra hende muhe, Kock a duna di conoce.
E ora a tuma e iniciativa pa adapta e evento aki pa Aruba y haci’e “Orange Aruba”. Pakico e color oraño? Ta pasobra cu United Nations ta compara e color oraño cu ora solo sali. E ora esaki a bira e simbolo cu cada dia ta un dia nobo. Un oportunidad nobo pa bringa contra violencia pa cu hende muhe y mucha muhe, Suzy Kock a duna di conoce.
Orange Aruba ta encera 16 dia intenso di actividad unda a haya cooperacion entre otro di CEDEHM, Stichting Rancho, IPA, Universidad di Aruba, Colegio Arubano San Nicolas.
“Di un cos chikito, el a bira den algo grandi na unda e idea ta pa conscientisa pueblo y pa haci e actividadnan aki por nada”, asina e Presidente di organisacion di hende muhe a bisa. E actividad a sigui cu un recaudacion di fondo riba Freewinds. A continua na CEDEHM dia 28 di november na MFA Paradera unda a duna un lectura tocante genero y igualdad. E eventonan ta sigui den luna di December. Riba 2 di December lo tin un evento grandi na Universidad di Aruba unda lo tin un dialogo entre diferente panelista, entre nan hende homber y lo puntra kico ta e solucion, a indica.
“Ta interesante pa nos como fundacion tende kico nan opinion ta, kico ta e solucion pa cu violencia domestico”, a remarca. Dia 4 di December, Arubaanse Padvinsters Gilde lo tin un marcha den Caya Grandi San Nicolas y na Theresita Center lo duna un presentacion. “Nan ta e unico organisacion na Aruba cu ta traha directamente cu mucha muhe. Nan ta empower nan”, a agrega. Stichting Rancho lo tin su evento dia 6 di December y nan den nan comunidad lo papia riba violencia domestico. Esey ta algo di elogia cu un fundacion ta acerca e fundacion pa algo asina, Suzy Kock a expresa.
El a sigui bisa cu dia 8 di December e fundacion lo tin su presentacion na MFA Noord cu un obra teatral ariba e problematica di violencia domestico. Lo tin dialogo y discusion riba e tema aki.Dia 9 di December, nan a wordo acerca door di “Task Force Mensen Handle”. Nan tin un lectura cu un orador di Baltimore cu ta bin specialmente pa elabora riba sclavitud y trafico di hende. Esaki ta bay tuma lugar na Cas di Cultura, di 8:30am pa 4:30pm. Pa dia 10 di December lo tin e clausura, cual lo ta uno festivo despues di 16 dia intensivo. “Pakico festivo?
Ta premira cu pa despues di 16 dia di e campaña aki, lo por bisa cu e tabata un exito y cu a duna oportunidad na hopi den nos pais, kico ta violencia domestico, kico nan por haci y asina nos lucha ta bay bira mas grandi y mas fuerte riba nos pais”, asina e Presidente di Fundacion Pa Hende Muhe den Dificultad a termina bisando.