Fundacion CINEARUBA ta trece bek cine riba dak un biaha mas diasabra awo

0

Diasabra awor ta un otro nochi di peliculanan bao di tur e streanan den centro di ciudad. E evento di tur prome diasabra di luna ta bek. Shortcutz Aruba y Rooftop Film Club ta inicia pa 7’or di anochi na Academy of Fine Arts and Design.

E luna aki Shortcutz Aruba ta enfoca riba Aruba su talentonan emergente cu e pelicula ‘Riba Liña Peligroso’ di Cedric Gei y Albert Bisclick, kendenan lo tey presente pa un sesion di pregunta. E pelicula di Rooftop Film Club pa e luna aki ta ‘Holy Motor’ di e director Frances Leos Carax.

Tanto Shortcutz Aruba y Rooftop Film Club ta un proyecto di Fundacion CINEARUBA cu e obhetivo di brinda na e talentonan emergente un plataforma internacional pa comparti nan peliculanan cu e publico local y internacional. E network di shortcutz ta activo na Europa y Latino America, Shortcutz Aruba ta esun prome den e region di Caribe. Shortcutz Aruba ta posibel danki na e apoyo di Academy of Fine Arts and Design, Fonds voor Cultuurparticipatie, Prins Bernhard Cultuurfonds Caribisch Gebied, VNO, RBC Royal Bank y Culturaruba.

Cine riba dak ta un concepto masha popular na otro paisnan y awor disponibel na Aruba tambe. Rooftop Film Club ta unda cu e publico por sinta relax y disfruta hunto cunan amistadnan di un pelicula clasico of artistico den un atmosfera urbano.

Shortcutz Aruba y Rooftop Film Club ta riba tur prome diasabra di luna. Pa 7’or di anochi e portanan ta habri y e presentacion ta inicia 7.30 di anochi. E evento ta tuma luga na Academy of Fine Arts and Design situa na Ooststraat 2, unda antes tabata Brenchie. Pa mas informacion por bishita www.cinearuba.com.