Dia 13 di Februari ultimo, pero 38 aña pasa, un fundacion a wordo institui, despues di un estudio haci riba peticion di e Gobierno insular di Aruba, cu e obhetivo pa traha– regla bou di su propio Statuto – na un solucion pa e scarsedad di vivienda reinante riba nos isla y ofrece vivienda digno na famianan, specialmente na esunnan di recurso financiero abou. A duna e fundacion e nomber Fundacion Cas pa Comunidad Arubano (FCCA). E derecho di existencia di FCCA hopi lihe tabata valido pa e comunidad di Aruba. Pa medio di FCCA, hopi famia por a construi, cumpra of huur un cas. Famianan cu salario nan abou tambe a haya un oportunidad pa yega na un cas conforme nan entrada.
Segun e Constitucion di Aruba y reglanan internacional, semper mester por ta posibel cu cada ciudadano di Aruba tin un vivienda digno. Tur bon desaroyo den un pais ta cuminsa na tin vivienda digno pa su ciudadanonan. Pero tin hopi hende na Aruba cu ainda no ta logra ariba propio forsa yega na un vivienda. Y ta aki e rol di FCCA hunto cu tur otro partnernan riba e area di vivienda ta bira importante. E rol di Gobierno di Aruba ta pa duna subsidio na e huurdo pa yuda paga e huur y pa pone terenonan di erfpacht disponibel na FCCA pa construccion di e casnan di huur social. Pa sigura cu e conviviencia entre habitantenan of tin ora entre miembronan di famia bibando den e casnan mes ta bon, e rol di instancianan na Aruba riba tereno social, educacional, hudicial y di salud ta sumamente importante.
Durante e prome añanan di su existencia FCCA a concentra hopi riba remedia mas tanto cu tabata posibel e scarsedad di vivienda riba e isla door di traha casnan social y door di ofrece fiansa hipotecario na e ciudadano pa e por construi su propio cas. Durante e pasada di añanan FCCA a crea proyectonan di vivienda pa esunnan di edad avansa, vivienda pa esunnan cu tin un of otro limitacion fisico, y pa e grupo di nos ciudadano cu mester extra cuido. Pues FCCA a percura pa construi casnan adapta y pagabel pa un y tur den necesidad di uno. Tambe e fundacion a percura pa mehora e barionan elevando asina e calidad di bida di e habitante y crea un miho medio ambiente pa biba aden. A cuminsa construi den e barionan acomodacionnan di recreo manera canchanan unda por eherce e deporte di futbol combina cu aparatonan pa e mucha mas chikito por hunga y esunnan mas grandi por haci ehercicio fisico.
FCCA tin su departamento cu ta encarga cu fiansa hipotecario unda,un y tur cu tin plan pa construi su cas propio of cumpra un cas riba mercado,por acudi. No mester di traha cita adelanta. Unabes e persona acudi na e oficina principal na Sabana Blanco of na e sucursal na San Nicolas, tin un persona pa atende nan y duna nan conseho. Continuamente FCCA ta sigui explora posibilidadnan pa yega na interesnan mas atractivo pa su clientenan. Tambe FCCA ta ofrece parcela na benta pa construccion di cas propio.
E ciudadano cu ta den necesidad di un cas di huur social, lo por acudi diariamente cerca e recepcionista y pidi pa wordo atendi. Mester acudi si cu documentonan manera un ID valido, muestra di Entrada, papel di Censo di 5 y di 10 florin. Actualmente e tempo di espera pa un cas social ainda ta largo ya cu e demanda ta halto, pero FCCA tin varios plannan di construccion di cas pa ehecuta den e añanan cu ta bin.
Pa e proximo añanan FCCA ta sigui cu e tarea di construi mas vivienda. Y como cu tereno pa construccion di vivienda ta birando mas scars, e idea ta pa bay construi mas tanto vertical. Den varios parcelacion di gobierno tin un of mas espacio cu a keda bashi. Pues no a construi nada riba nan. FCCA ta bay haci uzo di e oportunidad aki pa construi edificionan den cual por ubica mas unidad di vivienda. Di forma aki por ofrece mas oportunidad na esunnan cu ta sperando pa un vivienda.
Locual ta encera e futuro di construccion di vivienda, ta un obligacion tambe di nos como fundacion riba e ramo di vivienda pa aporta na cuido di nos medio ambiente. Esey ta hiba nos na e siguiente era di por crea barionan mas sostenibel door di haci uzo mas tanto di materialnan y sistemanan di construccion cu lo aporta na esaki. Pa logra esey, FCCA ta partner conhuntamente cu Gobierno di Aruba, TNO, companianan di Utilidad y Utilities pa yegan a e meta aki cu e proyecto di Smart Community Aruba, unda testnan lo wordo conduci den casnan habita den e clima di Aruba. E resultado aki ta bay man den man cu e desafio di sigui cu construccion di casnan pagabel pa e comunidad den futuro.
Durante e 38 aña di existencia, FCCA a otorga mas cu 10.750 credito hipotecario pa vivienda propio y a yuda mas cu 5.500famia cu un cas di huur social tambe. Cu e proyectonan di construccion aki, FCCA a apoya grandemente na e economia di Aruba.
FCCA ta hopi contento y orguyoso di e esfuersonan cu cada un di su empleadonan ta hinca diariamente den e fundacion na servicio di nos clientenan. No por tin tur e logronan menciona sin e empleadonan cu a labora bao guia di e diferente personanan cu a forma parti di gerencia durante e añanan di existencia. P’esey e 38 añanan aki a wordo celebra cu primeramente un bendicion pa tur, sigui pa un training riba tereno di teambuilding y despues un lunch cu e coleganan actual, pa finalmente culmina e dia cu un celebracion festivo interno.